Elimizde jumys istep turǵan munaı óńdeý zaýyttaryn jańǵyrtý kerek — Prezıdent

ASTANA. KAZINFORM — Búgin Úkimettiń keńeıtilgen otyrysynda Memleket basshysy Qasym-Jomart Toqaev óńdeletin munaı kólemin arttyrýdy tapsyrdy.

— Elimizdiń ımportqa táýeldiligi týraly aıtqanda munaı salasyndaǵy kúrdeli ahýalǵa toqtalmaı ketýge bolmaıdy. Qazaqstanda jylyna shamamen 100 mıllıon tonna munaı óndiriledi, biraq elimizde sonyń tek 18 mıllıon tonnasy ǵana qaıta óńdeledi. Sonyń saldarynan biz munaı óndirýshi el bolsaq ta, jyl ótken saıyn dızel otyny boıynsha tapshylyq paıda bolyp jatyr, avıatsııalyq kerosın boıynsha da ımportqa táýeldi bolyp otyrmyz, — dedi Qasym-Jomart Toqaev.

Prezıdenttiń sózine qaraǵanda, sondyqtan otynǵa degen suranystyń joǵary ekenin eskere otyryp, elimizde jumys istep turǵan munaı óńdeý zaýyttaryn jańǵyrtý kerek. Bul jumysty jedel oryndaý qajet. 

— Atalǵan qadam bir jylda óńdeletin munaı kólemin 9 mıllıon tonnaǵa arttyrýǵa múmkindik beredi (18,4 mıllıon tonnadan 27,4 mıllıon tonnaǵa deıin). Bul — mınıstrliktiń málimeti. Úkimet jańa munaı óńdeý zaýytynyń qurylysyna qatysty baıypty sheshim qabyldaýy qajet. Eń aldymen, munaı óńdeý zaýytyna shıkizat qaıdan jetkiziletinin, qandaı ónimdi jáne qansha kólemde óndiretinin durys esepteý kerek. Bul jobany iske asyrýǵa jeke ınvestor tartý kerek bolady. Búginde mundaı iri jobany tek memleket qarjysyna salý óte tıimsiz, — dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.