Elimizde júlde qory 30 mln teńge bolatyn patrıottyq ánder baıqaýy jarııalandy
ASTANA. KAZINFORM — El Táýelsizdiginiń 35 jyldyǵy qarsańynda respýblıkalyq patrıottyq ánder baıqaýy jarııalandy. Baıqaý Otan, týǵan jer jáne el birligi taqyrybyndaǵy jańa týyndylardy tanytýǵa, talantty avtorlardy anyqtaýǵa jáne zamanaýı patrıottyq ánder qoryn tolyqtyrýǵa baǵyttalady.
Baıqaýǵa elimizdiń barlyq óńirinen aqyndar men kompozıtorlar, sonyń ishinde shyǵarmashylyq jolyn endi bastaǵan avtorlar qatysa alady. Buǵan deıin jarııalanbaǵan jáne oryndalmaǵan ánder qabyldanady.
Mádenıet jáne aqparat mınıstrligi málimetinshe, baıqaý úsh baǵyt boıynsha ótedi. Olar: saltanatty patrıottyq ánder, lırıkalyq patrıottyq ánder jáne zamanaýı patrıottyq ánder. Qatysýshylar bir nemese birneshe baǵyt boıynsha shyǵarma usyna alady.
Týyndylardy kompozıtorlar, aqyndar men mýzyka mamandarynan quralǵan sarapshylar keńesi baǵalaıdy. Sarapshylar baǵa berýde ánniń áýeni, mátininiń sapasy, avtorlyq ıdeıasynyń tyń bolýy jáne tyńdarmanǵa áserin negizge alady.
Sarapshylar keńesiniń múshesi, aqyn Qalqaman Sarınniń aıtýynsha, baıqaý Otan men ulttyq bolmys taqyrybyn arqaý etetin ári tyńdarman kóńilinen shyǵatyn ánderdiń jazylýyn kózdeıdi.
Baıqaýdyń jalpy júlde qory – 30 mln teńge. Qarajatty demeýshiler bólgen. Júldeler tómendegideı belgilengen:
• Bas júlde – 6 mln teńge;
• I oryn – árqaısysy 4 mln teńgeden úsh júlde;
• II oryn – árqaısysy 3 mln teńgeden úsh júlde;
• III oryn – árqaısysy 1 mln teńgeden úsh júlde.
Ótinimder 2026 jylǵy 5 jeltoqsanǵa deıin khabar.kz/konkurs saıtynda qabyldanady. Jeńimpazdar Qazaqstan Respýblıkasynyń Táýelsizdik kúni qarsańynda jarııalanady.
Jobanyń bas aqparattyq seriktesi – «Habar» agenttigi» AQ.
Aıta keteıik, «Jyl volonteri — 2026» baıqaýynyń ekinshi kezeńine ótkenderdiń tizimi jarııalandy.
