Elimizde JRVI juqtyrǵandar sany 1,8 esege azaıdy
ASTANA. KAZINFORM – Qazaqstanda kúzgi maýsym bastalǵaly jiti respıratorlyq vırýstyq ınfektsııa (JRVI) jaǵdaılary ótken jyldyń sáıkes kezeńimen salystyrǵanda 1,8 esege az tirkeldi, dep habarlaıdy QR Densaýlyq saqtaý mınıstrligi.
Vedomstvo qyrkúıek aıynan bastap JRVI, tumaý jáne COVID-19 boıynsha syrqattanýshylyqqa apta saıyn monıtorıng júrgizip keledi.
Qyrkúıek aıynyń basynan beri elde 51 937 JRVI jaǵdaıy tirkelgen. Bul ótken jyldyń sáıkes kezeńindegi kórsetkishten 1,8 esege tómen. Búgingi tańda tumaý jaǵdaılary tirkelgen joq.
COVID-19 boıynsha da syrqattanýshylyq tómendegen. 2026 jyldyń basynan beri koronavırýs ınfektsııasynyń 87 jaǵdaıy anyqtaldy. Bul 2025 jyldyń sáıkes kezeńimen salystyrǵanda 10,3 esege az.
– COVID-19 basqa da maýsymdyq respıratorlyq vırýstarmen qatar aınalymda júr. Bul rette Qazaqstanda buryn belgisiz bolǵan jańa vırýstar anyqtalǵan joq, – delingen mınıstrlik habarlamasynda.
Densaýlyq saqtaý mınıstrligi kúz mezgilinde respıratorlyq ınfektsııalardyń taralýy dástúrli túrde kúsheıetinin eske saldy. Osyǵan baılanysty eldegi epıdemıologııalyq jaǵdaıǵa apta saıynǵy monıtorıng jalǵasady.
Mamandar JRVI, tumaý jáne basqa da respıratorlyq ınfektsııalardan qorǵaný úshin úı-jaılardy únemi jeldetip, qoldy jıi jýyp, jeke gıgıena talaptaryn saqtaýǵa keńes beredi. Sondaı-aq aýrý belgileri bar adamdarmen jaqyn qarym-qatynastan aýlaq bolyp, syrqattanýshylyq joǵary kezeńde adam kóp jınalatyn oryndarǵa barýdy shektegen jón.
Jótelgende nemese túshkirgende aýyz ben muryndy maılyqpen nemese shyntaqtyń búgilgen jerimen jabý usynylady. Dene qyzýy kóterilip, jótel, tamaq aýrýy jáne basqa da belgiler baıqalsa, úıde qalyp, der kezinde medıtsınalyq kómekke júginý qajet.
Aıta keteıik, Aqtóbede JRVI juqtyrǵandardyń kóbi balalar.
