Elimizde jol boıyndaǵy servısti damytýǵa 180 mlrd teńge ınvestıtsııa tartylady
ASTANA. KAZINFORM — Qazaqstanda halyqaralyq jáne respýblıkalyq mańyzy bar avtomobıl joldarynyń boıynda 250 kópfýnktsıonaldy servıstik nysan salý josparlanyp otyr.
Bul týraly Jibek Joly telearnasynyń «Búgin LIVE» baǵdarlamasynda QR Kólik mınıstrligi Avtomobıl joldary komıteti paıdalanýǵa berý basqarmasynyń bas sarapshysy Abdýllah Ábishev málimdedi.
– Halyqaralyq jáne respýblıkalyq mańyzy bar joldardyń boıynda kópfýnktsıonaldy nysandar salý josparlanǵan. Bul jobaǵa shamamen 180 mlrd teńge ınvestıtsııa tartylady. Qazaqstandaǵy barlyq kólik dálizderi boıynsha ınfraqurylym salynady. Qazir salynatyn 250 ýchaske belgilendi. Búginde «QazAvtoJol» kompanııasymen birlesip, ınvestorlar jumysty jalǵastyryp jatyr, – dedi Abdýllah Ábishev.
Onyń aıtýynsha, ınvestorlar bıyl atalǵan nysandardyń 50-in paıdalanýǵa berýdi kózdep otyr. Ár oblysta shamamen 5-6 nysan salý josparlanǵan.
– Qazirgi ýaqytta elimizde 1428 servıstik nysan jumys isteıdi. Onyń ishinde 1329-y ulttyq standart talaptaryna sáıkes keledi. Eger halyqaralyq standartqa saı taǵy 250 nysan qosylsa, bul kórsetkish edáýir jaqsarady, – dedi sarapshy.
Spıkerdiń málimetinshe, jańa nysandarda elektrli kólikterdi qýattaý stansalary ornatylady.
– Qazir jasyl energııaǵa suranys artyp, elektrli kólikter sany kóbeıip keledi. Alaıda olardy qýattaıtyn ınfraqurylym áli de jetkiliksiz. Osy máseleni sheshý úshin kópfýnktsıonaldy nysandar quramynda elektrli kólikterdi qýattaý beketteri ashylady. Sonymen qatar kún energııasyn paıdalanatyn panelder ornatylady, – dedi ol.
Sondaı-aq joba aıasynda 2 myńǵa jýyq jańa jumys orny ashylady.
– Jańa nysandardyń qurylysy men paıdalanýǵa berilýi nátıjesinde shamamen 2 myń jumys orny qurylady. Bul rette ınjenerlik sala mamandaryna suranys joǵary bolady, – dedi Abdýllah Ábishev.
Eske sala keteıik, «QazAvtoJol» tsementbeton plıtalaryndaǵy deformatsııa qaýpi bar 31 ýchaskeni anyqtady.
