Elimizde jylytý maýsymyna daıyndyq aıaqtalý kezeńinde — Energetıka mınıstrligi
ASTANA. KAZINFORM — Kúzgi-qysqy kezeńge daıyndyq jumystary josparǵa saı aıaqtalýǵa jaqyn. Bul týraly Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń tóraǵasy Erjan Erboluly Ertaev Ortalyq kommýnıkatsııalar qyzmeti alańynda ótken baspasóz konferentsııasynda málimdedi.
Spıkerdiń aıtýynsha, qazirgi ýaqytta Pavlodar oblysynda jylytý maýsymy bastalǵan. Aldaǵy kúnderi Soltústik Qazaqstan, Qaraǵandy jáne Aqmola oblystarynda jylytý maýsymynyń bastalýy kútilip otyr. Qalǵan óńirlerde jylytý jumystary belgilengen merzimge sáıkes júrgiziledi.
— 2024-2025 jyldardaǵy jylytý maýsymyna daıyndyq sheńberinde júıelik operator bekitken kestege sáıkes, 10 energoblokty, 63 qazandyqty jáne 39 týrbınany jóndeý josparlanǵan. Qazirgi tańda 6 energoblok, 29 qazandyq jáne 16 týrbınada jóndeý jumystary aıaqtaldy. Al 4 energoblokta, 31 qazandyq jáne 20 týrbınada jóndeý jumystary jalǵasyp jatyr, — dedi Ertaev.
Sonymen qatar spıker óz sózinde elektr jelileri boıynsha da aýqymdy jumystar atqarylyp jatqanyn atap ótti. Onyń aıtýynsha, jyl sońyna deıin 17 myń shaqyrym elektr jelisi men 420 qosalqy stantsııany jóndeý kózdelgen. Qazirgi ýaqytta bul jumystardyń 89 paıyzy — 16 myń shaqyrym jelide, al 94 paıyzy — 373 qosalqy stantsııada oryndalǵan.
— Barlyq jumystar bekitilgen kestege sáıkes júrgizilýde. Sonymen qatar Komıtettiń aýmaqtyq departamentteri apta saıyn kásiporyndarǵa baryp, jóndeý jumystarynyń barysyn baqylap otyr, — dep tolyqtyrdy komıtet tóraǵasy.
Buǵan deıin Premer-mınıstr jylytý maýsymyna daıyn emes óńirlerdi synaǵan bolatyn.