Elimizde jylyna 240 myń sapaly jumys ornyn qurý josparlanyp otyr
ASTANA. KAZINFORM — QR Ulttyq ekonomıka birinshi vıtse-mınıstri Azamat Ámrın Úkimette 2026–2029 jyldarǵa arnalǵan halyq tabysyn arttyrý jónindegi keshendi jospar qandaı nátıje beretini týraly boljamdy málimdedi.
— Atalǵan sharalardy atqarý nátıjesinde bıýdjet salasynda jumys isteıtin qyzmetkerlerdiń jalaqysy artady. Sondaı-aq, halyqtyń, ásirese, jalaqysy tómen jáne ortasha toptardyń tabysy ınflıatsııadan 2-3%-ǵa joǵary bolady. Bul qoǵamnyń ártúrli qabattary arasyndaǵy aıyrmashylyqty qysqartady, — dedi ol atalǵan jospar tanystyrylǵannan keıin uıymdastyrylǵan baspasóz konferentsııasynda.
Budan bólek, zamanaýı tehnologııalary men bilikti kadrlary bar sapaly jumys oryndary qurylyp, sonyń arqasynda óndiris tıimdiligi joǵarylaıdy. Jylyna 240 myń sapaly jumys orny qurylmaq.
Kásiporyndarmen 600-deı memorandým jasalyp, dýaldy oqytý modeli kúsheıtiledi. Nátıjesinde, adamı kapıtaldyń sapasy artyp, mamandar kásibı jáne tsıfrlyq daǵdylardy sińiredi.
Sonymen birge, aýyldyq jerlerde 30 myńnan astam bıýdjettik shaǵyn nesıe beriledi.
Kásipkerlik te damyp, sapaly jumys oryndary jylyna 10%-ǵa kóbeıip otyrady.
Áleýmettik mańyzy bar azyq-túlik taýarlary aıasyndaǵy ónimder men qyzmetterge qosylatyn saýda ústemesi 15% deńgeıinde turaqtaıdy.
Aýyl sharýashylyǵyndaǵy eńbek ónimdiligi 2029 jyly 8,2 mıllıon teńgege ósedi.
Sonymen qatar, 2029 jyly halyq tabysynyń azyq-túlikke jumsalatyn úlesi 40%-dan aspaıdy.
— Jalpy alǵanda, kásipkerlik pen kreatıvti ındýstrııany damytý, múmkindikterdi keńeıtý, sapaly jumys oryndaryn qurý, qarjylyq turaqtylyqty nyǵaıtýdyń arqasynda keshendi jospar aıasyndaǵy barlyq maqsat-mindet oryndalady, — dedi vıtse-mınıstr.
Aıta keteıik, buǵan deıin Azamat Ámrın qazaqstandyqtardyń nesıesi 27,5 trln teńgege jetkenin málimdegen edi.
