Elimizde jyl saıyn qaterli isikke 57 myńnan astam operatsııa jasalady

ASTANA. KAZINFORM – Elimizde qaterli isikterdi hırýrgııalyq emdeýdiń jańa ádisteri engizilip jatyr. Bul týraly Qazaq onkologııa jáne radıologııa ǵylymı-zertteý ınstıtýtynyń basqarma tóraǵasy Erbol Bekmuhambetov aıtty.

- Jyl saıyn 20 óńirlik jáne 2 Ulttyq onkologııalyq ortalyqta 57 myńnan astam hırýrgııalyq operatsııa jasalady. Onyń 20 paıyzy – III-IV sanattaǵy kúrdeli operatsııalar. Aldaǵy jyldary barlyq óńirde az ınvazıvti jáne ınterventsııalyq operatsııalar kóbeıetin bolady, - dedi Ortalyq kommýnıkatsııalar qyzmetindegi brıfıngte.

Onyń atap ótýinshe, qazirgi ýaqytta Qazaq onkologııa ınstıtýtynda qaterli isikterdi hırýrgııalyq emdeýdiń mynadaı jańa ádisterin engizip jatyr:

- onkoýrologııa, onkogınekologııa jáne abdomınaldi onkologııadaǵy robotty hırýrgııa;

- qaterli isik dıagnozy kezinde qańqa súıekterin 3D protezdeý;

- 3D ımplanttardy qazaqstandyq tıtannan ázirleý boıynsha jumystary.

- Qazirgi ýaqytta qazaqstandyqtarǵa targetti jáne ımmýnobıologııalyq preparattardyń 45 túri qoljetimdi. Bólingen 103 mlrd teńge qarjylandyrý kezinde targetti preparattarmen qamtý 83 paıyz. Dárilik terapııanyń qoljetimdiligin arttyrý jáne qarjy resýrstaryn utymdy paıdalaný úshin mınıstrlik ártúrli tásilder ázirlep jatyr. Mysaly, onkologııalyq aýrýlardy halyqaralyq standarttarǵa sáıkes dıagnostıkalaý men emdeý hattamalary jańartyldy, - dedi ınstıtýt basshysy.

Aıta keteıik, elimizde jyl saıyn elimizde 41 myńnan astam adamǵa onkologııalyq aýrýlar dıagnozy qoıylady.