Elimizde jyl saıyn 600-ge jýyq bala onkologııalyq aýrýǵa shaldyǵady

ASTANA. KAZINFORM — Elimizde jyl saıyn 600-ge jýyq bala onkologııalyq aýrýǵa shaldyǵady. Bul týraly búgin Úkimet otyrysynan keıingi brıfıngte Densaýlyq saqtaý mınıstrligi Ana men bala densaýlyǵyn saqtaý departamentiniń dırektory Maǵrıpa Embergenova aıtty.

— Qazirgi ýaqytta 5 myńnan astam bala onkologııalyq aýrýlar boıynsha esepte tur. Onyń ishinde jyl saıyn jańadan tirkelgen onkologııalyq aýrýlarmen 500-600 bala eki ortalyqta em qabyldaıdy, — dedi departament dırektory BAQ ókilderiniń saýalyna oraı.

Elimizde onkologııalyq skrınıngtik zertteýler tegin. Mundaı tekseris patsıenttiń tirkelgen jeri boıynsha medıtsınalyq-sanıtarııalyq alǵashqy kómek uıymdarynda júrgiziledi.

Sút bezi obyryn erte anyqtaý úshin:

• sút beziniń qaterli isikterimen dınamıkalyq baıqaýda turmaǵan 40, 42, 44, 46, 48, 50, 52, 54, 56, 58, 60, 62, 64, 66, 68, 70 jastaǵy áıelder;

Jatyr moıny obyryn erte anyqtaý úshin:

• jatyr moınynyń qaterli isikterimen dınamıkalyq baqylaýda turmaǵan 30, 34, 38, 42, 46, 50, 54, 58, 62, 66, 70 jastaǵy áıelder;

Kolorektaldy obyrdy erte anyqtaý úshin:

• jýan ishektiń qatersiz jáne qaterli isikterimen dınamıkalyq baıqaýda turmaǵan 50, 52, 54, 56, 58, 60, 62, 64, 66, 68, 70 jastaǵy erler men áıelder óte alady.

Jyl basynan beri Ulttyq ǵylymı onkologııa ortalyǵynda qan aýrýlaryna shaldyqqan 1,4 myńǵa jýyq patsıent em qabyldady. Osy kezeńde 60 súıek kemigin transplantattaý otasy jasaldy.