Elimizde jyl saıyn 4 myńǵa jýyq bala júrek aqaýymen dúnıege keledi
Qazaqstanda jyl saıyn 4 myńǵa jýyq bala týa bitken júrek aqaýymen ómirge keledi. Bul týraly UMC Klınıkalyq akademııalyq pedıatrııa departamentiniń dırektory, shtattan tys bas balalar kardıology Tatıana Ivanova-Razýmova aıtty.
Mamannyń sózinshe, olardyń shamamen myńyna ómiriniń alǵashqy kúnderi nemese alǵashqy aıynda ota jasaý qajet.
— Qazaqstanda jyl saıyn shamamen 400 myń sábı dúnıege keledi. Sonyń 4 myńǵa jýyǵynda júrektiń týa bitken aqaýy anyqtalady. Onyń 25 paıyzy — ómiriniń alǵashqy aıynda, keıde tipti alǵashqy kúnderinde hırýrgııalyq kómekke muqtaj bolatyn aýyr jaǵdaılar, — dedi Tatıana Ivanova-Razýmova.
Onyń sózinshe, mundaı sábılerge elimizdiń birneshe kardıohırýrgııalyq ortalyǵynda kómek kórsetiledi. Sonyń ishinde UMC-de jyl saıyn júrektiń aýyr týa bitken aqaýy bar 100-120 jańa týǵan nárestege operatsııa jasalady.
Sondaı-aq departament dırektory álemdik statıstıka boıynsha árbir myń tiri dúnıege kelgen balanyń 9-10-ynda júrektiń týa bitken aqaýy kezdesetinin atap ótti.
— Degenmen olardyń bárine birdeı operatsııa qajet emes. Keıbir aqaýlar bala ósken saıyn ózdiginen jabylady, — dedi spıker.
Aıta keteıik, Qazaqstanda 1,7 mln adam júrek-qantamyr aýrýlaryna tekserýden ótti.
