Elimizde jyl saıyn 360 myńnan astam sábı dúnıe esigin ashady
ASTANA. KAZINFORM — Búginde elimizde jyl saıyn 360 myńnan astam sábı dúnıe esigin ashady, olardyń densaýlyǵyn ómiriniń alǵashqy sátterinen bastap 4 myńnnan astam pedıatr, 1 myńnan astam neonatolog jáne jergilikti praktıka dárigerleri muqııat qadaǵalap, baqylaýda ustaıdy.
Qazaqstanda árbir bala týǵan sátinen bastap medıtsınalyq baqylaýǵa alynady.
— 7 mıllıonnan astam bala tegin medıtsınalyq kómekke qol jetkizse, jyl saıyn 2 mıllıonnan astam bala skrınıngten ótedi, 4,5 mıllıonnan astam bala profılaktıkalyq qarap-tekserýmen qamtylady, 1,5 mıllıonnan astam balaǵa ımmýndaý júrgiziledi, — dedi Densaýlyq saqtaý mınıstri.
Mektep jasyndaǵy balalarǵa erekshe nazar aýdarylady.
— Búginde árbir mektep belgili bir emhanaǵa bekitilgen, onda 6,5 myńnan astam medıtsınalyq pýnkt jumys isteıdi. Bul balalardyń densaýlyǵyndaǵy máselelerdi der kezinde anyqtap, kómek kórsetip, aýrýlardyń aldyn alýǵa múmkindik beredi, — dedi Aqmaral Álnazarova.
Osy jyldan bastap Memleket basshysynyń tapsyrmasy boıynsha Qazaqstanda mekteptegi tamaqtanýdyń jańa ulttyq standarty engizilip jatyr.
Ol ǵylymı usynymdar, ósip kele jatqan organızmniń qajettilikteri men salaýatty ómir salty qaǵıdattary negizinde ázirlengen.
Biz balalar densaýlyǵy ınfraqurylymyn damytý, erte dıagnostıkany kúsheıtý, neonataldyq kómek, onkopedıatrııa, ońaltý jáne
pallıatıvtik qoldaýǵa ozyq tehnologııalardy engizý jumysyn jalǵastyryp kelemiz, — dedi Densaýlyq saqtaý mınıstri Aqmaral Álnazarova.
2025 jyldan bastap emhanalarda erte aralasý ortalyqtary ashylady, olar kómekke muqtaj barlyq balalardy qoldaýmen qamtamasyz etý úshin jumys isteıdi.
Qazaqstan balalardyń stomatologııalyq densaýlyǵyna erekshe kóńil bóledi.
— «Bolashaqqa — saý tispen» baǵdarlamasy sheńberinde elimizdegi barlyq mektebinde mindetti stomatologııalyq qarap-tekserý men tisjegi damýynyń aldyn alý sharalary engizildi. Men, pedıatr-dáriger jáne mınıstr retinde, balanyń densaýlyǵy — bul onyń tolyqqandy damýynyń, ómirdegi jetistiginiń jáne búkil ulttyń bilimi men kúshiniń negizi ekenin jaqsy bilemin, — dedi mınıstr.
Aıta ketelik mektepterde 1 myńnan astam stomatologııa kabıneti ashylatyny týrnaly jazǵan edik.