Elimizde jyl saıyn 36 myń neırohırýrgııalyq operatsııa jasalady
ASTANA. KAZINFORM — Qaraǵandy qalasynda Qazaqstan Respýblıkasy Táýelsizdiginiń 35 jyldyǵyna arnalǵan VI Qazaqstan neırohırýrgteri kongresi ótip jatyr. Bul týraly DSM baspasóz qyzmeti málim etti.
Іs-sharaǵa neırohırýrgııa salasyndaǵy jetekshi otandyq mamandar, Neırohırýrgııa ulttyq ortalyǵynyń ókilderi, elimizdiń óńirlerinen kelgen dárigerler, sondaı-aq rezıdentter men jas mamandar qatysýda. Jalpy alǵanda, Qazaqstannyń barlyq óńirinen shamamen 200 delegat jınaldy.
— Kongress barysynda neırohırýrgııalyq qyzmetti damytýdyń ózekti máseleleri, neırohırýrgııalyq aýrýlardy dıagnostıkalaý men emdeýdiń zamanaýı tásilderi, kúrdeli klınıkalyq jaǵdaılar, óńirlik neırohırýrgııany damytý perspektıvalary jáne jańa tehnologııalardy praktıkalyq densaýlyq saqtaý júıesine engizý máseleleri qarastyryldy, — delingen habarlamada.
Qazaqstan Respýblıkasynyń Densaýlyq saqtaý mınıstri Aqmaral Álnazarova Kongress qatysýshylaryn quttyqtaı otyryp, elimizde neırohırýrgııalyq kómektiń kópdeńgeıli júıesi qalyptasqanyn jáne joǵary tehnologııalyq medıtsınanyń qarqyndy damyp kele jatqanyn atap ótti.
— Elimizde jyl saıyn 36 myńnan astam neırohırýrgııalyq operatsııa jasalady. Klınıkalyq tájirıbege zamanaýı mıkroneırohırýrgııalyq tehnologııalar, az ınvazıvti jáne endoskopııalyq aralasýlar belsendi túrde engizilýde. Kongress kásibı dıalog júrgizýge, tájirıbe almasýǵa jáne kúrdeli klınıkalyq jaǵdaılardy talqylaýǵa arnalǵan biregeı alań bolyp tabylady, — dep atap ótti mınıstr.
Óz kezeginde Qazaqstan neırohırýrgtar qaýymdastyǵynyń prezıdenti, akademık Serik Aqsholaqov Kongress eldegi neırohırýrgııalyq qyzmetti damytý, jańa tehnologııalardy engizý jáne kadrlar daıarlaý máselelerin talqylaýǵa arnalǵan dástúrli alańǵa aınalǵanyn aıtty.
Іs-sharanyń mańyzdylyǵyn arttyra túsetin jaıt — Kongrestiń Qazaqstan Respýblıkasy Táýelsizdiginiń 35 jyldyǵy aıasynda ótkizilýi.
— Táýelsizdik jyldary ishinde otandyq neırohırýrgııa mamandandyrylǵan ortalyqtardy qurýdan jáne kadrlar daıarlaýdan bastap, halyqaralyq standarttar deńgeıindegi joǵary tehnologııalyq medıtsınalyq kómekti engizýge deıingi aýqymdy damý jolynan ótti, — dedi akademık.
Búginde qazaqstandyq neırohırýrgter halyqaralyq ǵylymı jobalarǵa belsendi qatysyp, jetekshi salalyq basylymdarda maqalalaryn jarııalap, elimizdiń atynan álemdik kásibı alańdarda tabysty óner kórsetip otyr.
Osyndaı ǵylymı-praktıkalyq is-sharalardy ótkizý otandyq neırohırýrgııanyń odan ári damýyna, medıtsınalyq kómektiń sapasyn arttyrýǵa jáne jas mamandardyń kásibı daıarlyǵyn jetildirýge yqpal etedi.
Aıta keteıik, ana ólimi, onkologııa sondaı-aq vaktsınatsııa boıynsha óńir dárigerlerine mindet júktedi.
