Elimizde jyl saıyn 300–350 sýdıanyń orny bos qalady

  ASTANA. KAZINFORM — Qazaqstanda sýdıa tapshylyǵy máselesi qalaı sheshilip jatyr? Bul saýalǵa Joǵarǵy sot keńesiniń múshesi Saltanat Júnisbekova jaýap berdi.

— Jyl saıyn shamamen 300–350 sýdıalyq oryn bos qalyp jatady. Onyń arty sýdıalardyń shamadan tys júktemesine, merziminen buryn otstavkaǵa ketýine jáne óz erkimen qyzmetin bosatýyna alyp keledi, — dedi Saltanat Júnisbekova ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, jaǵdaıdy ózgertý úshin bos laýazymdarǵa konkýrs ótkizý tártibi qaıta qaraldy.

Atap aıtqanda:

— konkýrstardyń sany jylyna eki retten alty retke deıin artty;

— bir konkýrsty ótkizý merzimi alty aıdan eki aıǵa deıin qysqartyldy;

— konkýrstyq úderis ashyq ári obektıvti boldy, ıaǵnı sýbektıvızm joıylyp, naqty jáne túsinikti ólshemsharttarǵa basymdyq berildi;

— úmitkerlerdi baǵalaý kezinde azamattardyń pikiri men qoǵamdyq keńesterdiń usynymy eskeriledi.

Joǵarǵy sot keńesi múshesiniń málimdeýinshe, joǵaryda atalǵan sharalar sýdıalar korpýsyn jasaqtaý protsesin jedeldetýge, sapany arttyrýǵa jáne sýdıalardyń júktemesin azaıtýǵa múmkindik beredi.

Buǵan deıin habarlaǵanymyzdaı, elimizde sýdıalardy irikteý júıesi túbegeıli ózgerdi.

Aıta keteıik, búgin Qazaqstanda kassatsııalyq sottar jumysyn bastady.