Elimizde jyl saıyn 1,5 myńǵa jýyq nárestege kúrdeli ota jasalady
ASTANA. KAZINFORM — Qazaqstanda jyl saıyn 1,5 myńǵa jýyq nárestege hırýrgııalyq operatsııa jasalady. Onyń 40 paıyzy tinderdi barynsha az zaqymdaıtyn endovıdeohırýrgııalyq ádispen júrgiziledi. Aldaǵy ýaqytta elde balalardy shetelge emdelýge jiberý kórsetkishin taǵy 50 paıyzǵa qysqartý josparlanyp otyr.
Bul týraly Almatyda ótken «Balanyń densaýlyǵy men damýy» atty halyqaralyq ǵylymı-praktıkalyq konferentsııada aıtyldy.
Jıynǵa toǵyz eldiń ǵalymdary, pedıatrlary, balalar hırýrgteri jáne Dúnıejúzilik densaýlyq saqtaý uıymynyń sarapshylary qatysty. Mamandar aýrýlardy erte anyqtaý, balalarǵa medıtsınalyq kómek kórsetý sapasyn arttyrý jáne medıtsına qyzmetkerlerin daıarlaý máselelerin talqylady.
QR Densaýlyq saqtaý mınıstrligi Ana men bala densaýlyǵyn saqtaý departamentiniń dırektory Maǵrıpa Embergenovanyń aıtýynsha, Qazaqstanda joǵary tehnologııalyq medıtsınalyq kómekti el ishinde qoljetimdi etý baǵytynda jumystar júrgizilip jatyr.
Qazir otandyq klınıkalarda «Gamma-pyshaq» jáne protondyq terapııa ádisteri qoldanylady. Sondaı-aq mı isikteri men qan tamyrlary patologııalaryn emdeýge múmkindik beretin gıbrıdti operatsııalyq keshen iske qosylǵan.
Balalarǵa kórsetiletin basqa da medıtsınalyq kómektiń kólemi aıtarlyqtaı. Jyl saıyn 2 myńnan astam bala kardıohırýrgııalyq kómek alady, 500 balaǵa estý ımplanttary ornatylady. Al shala týǵan 700-ge jýyq sábıge kózdiń torly qabyǵynyń retınopatııasyn emdeý sharalary júrgiziledi.
Qazaqstan balalardy emdeý úshin shetelge jiberýdi azaıtyp keledi. Sońǵy úsh jylda týystyq baılanysy joq donorlardan diń jasýshalaryn transplantattaý úshin shetelge jiberiletin balalar sany úsh ese, al kardıohırýrgııalyq operatsııalar úshin jiberý kórsetkishi 5,2 ese azaıǵan.
Vedomstvo aldaǵy ýaqytta radıoıodterapııany engizip, qan tamyrlary malformatsııalaryn emdeýdiń zamanaýı ádisterin iske qosýdy josparlap otyr.
— 2027 jyldan bastap shetelde emdelýge jiberiletin patsıentter sanyn kezeń-kezeńimen taǵy 50 paıyzǵa qysqartý josparlanýda. Bul úshin klınıkalardy zamanaýı jabdyqtarmen qamtamasyz etýdi jalǵastyrý, ınnovatsııalyq tehnologııalardy engizý jáne kez kelgen kúrdeliliktegi operatsııalardy jasaı alatyn otandyq mamandardy turaqty daıarlaý qajet, — dedi Maǵrıpa Embergenova.
Eske salaıyq, buǵan deıin Qaraǵandyda týǵanyna 19 kún bolǵan nárestege kúrdeli júrek otasy jasalǵanyn jazǵanbyz.
