Elimizde jyl basynan bergi jalpy ishki ónimniń ósýi 3,3% qurady

ASTANA. KAZINFORM - QR Ulttyq ekonomıka mınıstrligi aǵymdaǵy jyldyń birinshi jartyjyldyǵyndaǵy Qazaqstan Respýblıkasynyń ekonomıkalyq damýynyń qorytyndylary týraly habarlady. 

Ulttyq statıstıka bıýrosynyń jedel derekteri boıynsha jalpy ishki ónimniń (JІÓ) naqty ósýi aǵymdaǵy jylǵy qańtar-mamyrdaǵy 3,2%-pen salystyrǵanda jedeldeýdi kórsetip, 3,3%-ti qurady. Dınamıkanyń jaqsarýy taýarlar óndirisinde de (3,5%-ten 3,6%-ke deıin), sondaı-aq qyzmet kórsetý sektorynda da (3,1%-ten 3,3%-ke deıin) baıqalady.

Ótken jylmen salystyrǵanda ekonomıkanyń ósý qarqynynyń baıaýlaýy ekonomıkanyń edáýir sektorlarynyń damýyna, onyń ishinde saýda, kólik, logıstıka jáne t.b. shekteýshi áser etken 10 óńirdegi sý tasqyny saldarynyń áserimen, sondaı-aq munaı óndirýdiń 1,6%-ke qysqarýymen baılanysty.

JІÓ qurylymynda ekonomıka ósýiniń basty faktorlarynyń biri ónerkásiptik óndiris bolyp tabylady, onyń kólemi 2,8%-ke ulǵaıdy.

Óńdeý ónerkásibinde turaqty ósý (5,1%-ke) saqtalýda, ol taý-ken óndirý ónerkásibindegi (0,3%-ke) ósýden edáýir ozyq qarqynmen ósip keledi.

Óńdeý ónerkásibiniń salalary arasynda mashına jasaý óndirisiniń 9,4%-ke, metallýrgııanyń 8,3%-ke, hımııa ónerkásibiniń 5,3%-ke, farmatsevtıkalyq ónimniń 14,8%-ke jáne jıhaz óndirisiniń 28,3%-ke ósýi qamtamasyz etildi.

Qurylys jumystarynyń kólemi 2,7 trln teńgeni qurady jáne bes aıdaǵy kórsetkishpen salystyrǵanda 0,5 protsenttik tarmaqqa jedeldep, 8,6%-ke ósti.

Aǵymdaǵy jyldyń qańtar-maýsym aılarynda 4,6 mln sharshy metr kóppáterli úı paıdalanýǵa berildi, bul ótken jyldyń sáıkes kezeńinen 5,9%-ke joǵary.