Elimizde jyl basynan beri 780 shaqyrym kanal tazartyldy

ASTANA. KAZINFORM — 2025 jyldyń basynan beri Sý resýrstary jáne ırrıgatsııa mınıstrliginiń «Qazsýshar» RMK fılıaldary egis alqaptaryna sý jetkizýdi tıimdirek etý úshin 780 shaqyrym kanaldy mehanıkalyq ádispen tazartty.

Bıyl barlyǵy 2 011 shaqyrym kanaldy tazartý josparlanyp otyr. Mınıstrlik málimetinshe, kestege sáıkes, qalǵan 1 231 shaqyrym kanaldy mehanıkalyq jolmen tazartý jumystary vegetatsııa kezeńinen keıin jalǵasady.

Kanaldardy tazartýdyń basty maqsaty – sýarý júıeleriniń tıimdiligin arttyrý jáne sýdyń shyǵynyn boldyrmaý, bul ásirese sý resýrstary shekteýli jaǵdaılarda mańyzdy.

- Sharýa qojalyqtaryna turaqty sý jetkizý úshin 517 gıdrotehnıkalyq nysan jóndelip jatyr. Sýarý kezeńi bastalǵanǵa deıin 78 qurylym jóndeldi. Qalǵan 439 nysandy vegetatsııa kezeńi aıaqtalǵannan keıin tıisti jaǵdaıǵa keltirý josparda bar. Barlyq jumys jyl sońyna deıin aıaqtalady, - dedi Sý resýrstary jáne ırrıgatsııa vıtse-mınıstri Erbolat Ibraıhanov.

Qurylys-montajdaý jáne tazartý jumystarynda jańa arnaıy tehnıka belsendi qoldanylyp jatyr. Sý resýrstary jáne ırrıgatsııa mınıstrligi «Qazsýshar» RMK-nyń respýblıka boıynsha barlyq fılıalyn jańa qural-jabdyqtarmen jáne avtokólikpen jaraqtandyrýdy jalǵastyryp keledi.

Búgingi tańda mekeme fılıaldary josparlanǵan 757 arnaıy tehnıkanyń 524-in aldy.

Aıta keteıik, dıqandardy qosymsha sýarmaly sýmen qamtamasyz etý úshin «Qazsýshar» RMK Túrkistan fılıaly «Mashınalyq ádispen sý kóterý kanalyn» mehanıkalyq tazartýdy bastady.