Elimizde jyl basynan beri 388 myńnan astam adam jumysqa ornalasty
ASTANA.KAZINFORM - 1 tamyzdaǵy jaǵdaı boıynsha elimizde 388 512 adam jumysqa ornalasty. Halyqty jumyspen qamtýǵa baǵyttalǵan memlekettik sharalar jyl boıy jalǵasyp jatyr.
Bul rette azamattardy turaqty jumyspen qamtýǵa basymdyq berilip otyr. Jyl basynan beri 293 241 adam turaqty jumysqa ornalasty. Eńbek jáne halyqty áleýmettik qorǵaý mınıstrligi málimetinshe, jumysqa turǵandardyń basym bóligi uzaq merzimdi eńbekpen qamtyldy.
Turaqty qyzmet azamattyń tabysyn qalyptastyryp, erteńine senimdi bolýyna jaǵdaı jasaıdy. Al eńbek sharty resmı túrde jasalǵan jaǵdaıda, qyzmetker zańda kózdelgen eńbek pen áleýmettik kepildikterdi paıdalana alady.
Jumysqa ornalasýǵa kómektesetin tsıfrlyq qyzmetterdiń damýy da bul baǵyttaǵy jumysqa oń áser etip otyr. Sonyń ishinde Elektrondyq eńbek bırjasy arqyly jumys izdeýshiler bos jumys oryndary týraly aqparat alyp, ózine qolaıly jumysqa ótinish bere alady. Jumys berýshiler de qajetti qyzmetkerdi izdeı alady.
Bul júıe jumys berýshiler usynǵan bos jumys oryndary men jumys izdep júrgen azamattardyń suranysyn jyldam sáıkestendirýge múmkindik beredi. Nátıjesinde adamdarǵa ózine laıyqty jumys tabýǵa kómek kórsetiledi.
Buǵan qosa azamattardyń eńbek naryǵyndaǵy múmkindigin arttyrý úshin kásibı oqytý baǵdarlamalary men jumyspen qamtý sharalary júzege asyrylyp jatyr. Olar suranysqa ıe mamandyqtardy meńgerýge, jańa daǵdylardy úırenýge jáne jumysqa ornalasýǵa múmkindik beredi.
Bıyl Shymkentte shetel azamattaryn jumysqa tartýǵa 18 myńnan astam kvota bólingenin jazǵan edik.
