Elimizde JI-kameralar patrýl kólikterine de ornatyldy
ASTANA.KAZINFORM – Qazaqstanda jasandy ıntellektige negizdelgen kameralar tek statsıonarlyq júıelerde ǵana emes, patrýldik polıtsııa kólikterinde de qoldanylady. Bul týraly QR ІІM Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova túsindirdi.
Onyń aıtýynsha, elde «TOR» dep atalatyn biryńǵaı aqparattyq júıe jumysy iske qosylǵan. Bul júıege eldi mekenderdegi barlyq kamera, patrýl kólikterindegi qurylǵylar men planshetter biriktirilgen. Barlyq derek Jedel basqarý ortalyqtaryna túsip, sol jerde jasandy ıntellekt arqyly óńdeledi.
– Júıe avtokólikti nemese adamdy izdeý kezinde qolda bar az ǵana belgiler arqyly izdeý aýmaǵyn qysqartýǵa múmkindik beredi. Mysaly, kóliktiń tek túsi nemese markasy belgili bolsa, ne adamnyń kózildirik, kepka sekildi aıryqsha belgileri ǵana bolsa da, JI sol málimetterge sáıkes tizim qalyptastyrady, – dedi ol Jibek Joly telearnasyndaǵy «Bugin LIVE» baǵdarlamasynda.
Al patrýldik kólikterge ornatylǵan mobıldi avtomatty tirkeý keshenderi byltyrdan beri qoldanylyp keledi. Qazir Qazaqstan boıynsha mundaı 500-den astam kamera bar. Olar avtopatrýldiń qozǵalys baǵyty boıynsha 360 gradýs aýqymda jol erejesin buzýdy avtomatty túrde tirkeıdi. Tirkelgen quqyqbuzýshylyqtar aldymen protsessıngtik ortalyqta tekseriledi. Derek rastalǵan jaǵdaıda ǵana aqparat Bas prokýratýranyń quqyqtyq statıstıka júıesine jiberilip, júrgizýshiniń jeke kabınetine ákimshilik uıǵarym retinde túsedi.
– Jasandy ıntellekt qatelesýi múmkin. Sondyqtan barlyq materıal aldymen tekserýden ótedi. Eger quqyqbuzýshylyq dáleldenbese, uıǵarym jiberilmeıdi. Al júrgizýshi kelispegen jaǵdaıda, Ákimshilik kodekske sáıkes shaǵym túsirýge quqyly, – dedi ınspektor.
Kameralardyń bir bóligi jasyryn patrýldeý rejıminde jumys isteıdi. Olar qoǵamdyq kólikterge, jedel járdem mashınalaryna jáne arnaıy belgisi joq avtokólikterge ornatylǵan. Bul ásirese qala syrtyndaǵy joldarda polıtsııanyń kózge kórinbeıtin qatysýyn qamtamasyz etýge baǵyttalǵan.
Aqtoty Boranovanyń aıtýynsha, tsıfrlandyrý polıtsııa qyzmetiniń júktemesin shamamen 50 paıyzǵa azaıtqan. Bul quqyq qorǵaý organdaryna profılaktıkaǵa, adamdarmen tikeleı jumys isteýge kóbirek kóńil bólýge múmkindik berip otyr.
– Júıelerdiń maqsaty – jazalaý emes, jol-kólik oqıǵalarynyń, qylmystyń aldyn alý. Eger júrgizýshi erejeni buzbasa, ony eshkim toqtatpaıdy, – dedi Aqbota Boranova.
Aıta keteıik, buǵan deıin TOR jol qaýipsizdiginiń biryńǵaı tsıfrlyq platformasy iske qosylǵanyn jazǵan edik.