Elimizde jetim balalardy ınternat uıymdaryna ornalastyrý tártibi ózgerdi

ASTANA. KAZINFORM — 2025 jyldan bastap Qazaqstanda jetim balalar men ata-anasynyń qamqorlyǵynsyz qalǵan balalardy ınternat uıymdaryna joldaý tártibi ózgerdi. Bul týraly Oqý-aǵartý mınıstrliginiń baspasóz qyzmeti habarlady. 

Endi bala anyqtalǵan sátten bastap qorǵanshylyq jáne qamqorshylyq organdary olardy aldymen úsh táýlikke deıin tolyq tekserýden ótkizý úshin medıtsınalyq uıymdarǵa ýaqytsha ornalastyrýǵa mindetti.

— Bul qadam balanyń densaýlyǵyn der kezinde tekserýge, qajet bolsa medıtsınalyq kómek kórsetýge jáne zań aıasynda ári qaraıǵy qoldaýdy uıymdastyrýǵa múmkindik beredi. Eń bastysy — árbir bala alǵashqy kúnnen-aq memlekettiń qamqorlyǵy men qoldaýyn sezinedi, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Depýtattardyń bastamasy Mindetti áleýmettik medıtsınalyq saqtandyrý jáne medıtsınalyq qyzmet kórsetý týraly zań aıasynda Bala quqyqtary jónindegi ýákildiń qoldaýymen qabyldandy.

Eske sala keteıik, búginde respýblıkada jetim balalar men ata-anasynyń qamqorlyǵynsyz qalǵan balalarǵa arnalǵan 111 uıym bar. Onda 3,6 myńnan astam bala tárbıelenip jatyr. Sondaı-aq, 17 myńnan astam jetim bala otbasylardyń qamqorlyǵynda ósip jatyr. 

Aıta ketelik elde úsh myńnan astam jetim bala asyrap alynǵan edi.