Elimizde jeti mıkroqarjy uıymy lıtsenzııasynan aıyryldy
ASTANA. KAZINFORM — Qarjy naryǵyn retteý jáne damytý agenttigi qarjylyq qyzmetterdi tutynýshylardyń quqyqtary men zańdy múddelerin qorǵaýdy qamtamasyz etý, mıkroqarjy uıymdarynyń qyzmetin qadaǵalaýdy kúsheıtý jáne qarjy naryǵynda josyqsyz praktıkalardy boldyrmaý jónindegi dáıekti jáne júıeli jumysty jalǵastyryp jatqanyn habarlady.
Qadaǵalaý ókilettikterin júzege asyrý sheńberinde agenttik jekelegen mıkroqarjy uıymdarynyń qyzmetine tekserý júrgizip, sonyń nátıjesi boıynsha qarjylyq qyzmetterdi tutynýshylardyń quqyqtaryn buzýǵa alyp kelgen zańnama talaptaryn júıeli túrde buzǵandardy anyqtaldy.
Osyǵan baılanysty agenttik jeti MQU-ny mıkroqarjylyq qyzmetti júzege asyrýǵa arnalǵan lıtsenzııadan aıyrý týraly sheshim qabyldady.
2026 jylǵy 23 qazandaǵy buıryqtar negizinde tómendegi MQU lıtsenzııalardan aıyryldy:
«MaxMoney» MQU» JShS» (23.10.2026j. №67 buıryq);
«Microfinance Systems» MQU» JShS (23.10.2026j. №68 buıryq);
«SurfKaz Finance» MQU» JShS (23.10.2026j. №69 buıryq);
«MFO№1» MQU» JShS (23.10.2026j. №70 buıryq);
«Ýmıt Fınans» MQU» JShS (23.10.2026j. №71 buıryq);
«Vıvýs» MQU» JShS (23.10.2026j. №15 buıryq);
«EL QAZYNA» MQU» JShS (23.10.2026j. №16 buıryq).
Azamattardyń quqyqtary men zańdy múddelerin qorǵaý qadaǵalaý qyzmetiniń negizgi basymdyqtarynyń biri bolyp sanalady. Agenttik qarjylyq qyzmetterdi tutynýshylardyń quqyqtaryn qozǵaıtyn zańnamany júıeli túrde buzýǵa jol beretin uıymdarǵa qatysty naqty pozıtsııany ustanatynyn málim etti.
Qabyldanǵan sheshimder buzýshylyqtardyń jolyn kesýge, josyqsyz praktıkalardyń aldyn alýǵa, mıkroqarjy naryǵyna qatysýshylardyń jaýapkershiligin arttyrýǵa jáne zańnamada belgilengen talaptardyń saqtalýyn qamtamasyz etýge baǵyttalǵan.
Agenttik qaryz alýshylardyń quqyqtaryn saqtaýǵa, buzýshylyqtardy ýaqytyly anyqtaýǵa jáne zańnamada kózdelgen qadaǵalap den qoıý sharalaryn qoldanýǵa erekshe nazar aýdara otyryp, MQU qyzmetin júıeli jáne táýekelge baǵdarlanǵan qadaǵalaýdy jalǵastyrady.
Zańnama men qarjylyq qyzmetterdi tutynýshylardyń quqyqtaryn saqtaý mıkroqarjy naryǵyna qatysýshylar qyzmetiniń mindetti sharty bolyp sanalady. Azamattardyń quqyqtaryn júıeli túrde buzýǵa jol berilmeıdi jáne zańnamada kózdelgen saldarǵa alyp keledi.
Lıtsenzııadan aıyrylǵan MQU mıkroqarjylyq qyzmetti júzege asyrýǵa, sondaı-aq jekelegen jaǵdaılardy qospaǵanda, mıkrokredıt berý týraly qoldanystaǵy sharttardyń talaptaryn ózgertýge quqyly emes.
Zańnamaǵa sáıkes MQU lıtsenzııadan aıyrylǵan kúnnen bastap kúntizbelik 30 kún ishinde óziniń ataýynan «mıkroqarjy uıymy» degen sózderdi, kórsetilgen zańdy tulǵanyń mıkrokredıtter berý jónindegi qyzmetti júzege asyratynyn boljaıtyn olardan alynǵan sózder men qysqarǵan sózderdi alyp tastaý arqyly qaıta tirkeý rásimin júrgizýge ne qaıta uıymdastyrý nemese taratý týraly sheshim qabyldaýǵa mindetti.
Mıkrokredıt berý týraly sharttar boıynsha oryndalmaǵan mindettemeleri bar MQU klıentteri jasalǵan sharttardyń talaptaryna sáıkes mindettemelerdiń oryndalýyn buzǵany úshin jaýapty bolady.
Buǵan deıin 43 myń qazaqstandyqty aldaǵan mıkroqarjy uıymy áshkerelengenin jazǵan edik.
