Elimizde jerdiń 100 paıyzǵa jýyǵy tozǵan – Senat depýtaty

ASTANA. KAZINFORM — Senat depýtaty Zákirjan Kýzıev jerdiń tozýy máselesin kóterip, ol boıynsha naqty usynystar ázirleý kerektigin aıtty.

— 2018 jyly elimiz Birikken Ulttar Uıymynyń azyq-túlik jáne aýyl sharýashylyǵy uıymymen negizgi kelisimdi ratıfıkatsııalady. Búginde atalǵan uıym jerdiń tozýy, tuqym sharýashylyǵy máseleleri boıynsha bizdiń negizgi keńesshi uıym. Májilistiń agrarlyq komıteti BUU uıymymen barlyq baǵyt boıynsha, tyǵyz jumys isteıdi, onyń ústine agrarlyq komıtet topyraqty qorǵaý týraly zań jobasyna bastamashylyq etti. Bul zań Úkimettiń qorytyndysyn aldy, sondaı-aq biz BUU uıymynan keńes, qoldaý aldyq, — dedi Zákirjan Kýzıev elordada ótip jatqan aýyl sharýashylyǵy salasyn damytýǵa arnalǵan dóńgelek ústel barysynda BAQ ókilderiniń saýalyna jaýap bere turyp.

Senatordyń aıtýynsha, qazir elimizde tuqym sharýashylyǵy týraly zań jobasy talqylanyp jatyr. 

— Atalǵan zań jobasy Birikken Ulttar Uıymynyń azyq-túlik jáne aýyl sharýashylyǵy uıymynyń halyqaralyq sarapshylarymen talqylanyp jatqan mańyzdy qujat. Osy oraıda Qazaqstan men uıym arasyndaǵy qalyptasqan yntymaqtastyq óz nátıjesin berip jatyr dep oılaımyn. Búgin biz jerdiń tozýy máselelerin talqyladyq, Qazaqstanda jerdiń 100%-ǵa jýyǵy belgili bir deńgeıde tozǵan. Sondyqtan, bul biz úshin ózekti jáne búgingi dóńgelek ústel aıasynda naqty usynystar ázirleı alamyz dep senemin, — dep tolyqtyrdy halyq qalaýlysy.

Buǵa deıin habarlaǵanymyzdaı elimiz shegirtkemen jasandy ıntellektiniń kómegimen kúrespek. 

Búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń aýyl sharýashylyǵy mınıstrliginiń uıytqy bolýymen azyq-túlik júıelerin qaıta qurý boıynsha áleýmettik jobalardy talqylaýǵa arnalǵan dóńgelek ústel ótip jatyr.