Elimizde jerasty sýlaryn basqarýdyń jańa tujyrymdamasy qabyldanbaq
ASTANA. KAZINFORM – Elimizde jerasty sýlaryn keshendi paıdalaný jáne basqarýdyń 2027–2040 jyldarǵa arnalǵan tujyrymdamasynyń jobasy ázirlendi. Qazir qujat múddeli memlekettik organdarmen kelisilip jatyr. Ony bıylǵy jyldyń sońyna deıin qabyldaý josparlanǵan.
Bul týraly QR Sý resýrstary jáne ırrıgatsııa vıtse-mınıstri Talǵat Momyshev Ortalyq kommýnıkatsııalar qyzmetinde ótken brıfıngte málimdedi.
Onyń aıtýynsha, negizgi mindetterdiń biri – jerasty sý kózderin ekonomıkanyń barlyq salasynda keńinen paıdalaný jáne ınvestıtsııa tartýǵa qolaıly jaǵdaı jasaý.
– Elimizde jerasty sý resýrstarynyń eleýli qory bar. Bekitilgen paıdalaný qory táýligine 43,2 mln tekshe metrdi nemese jylyna 15,7 tekshe shaqyrymdy quraıdy. Onyń 21,2 mln tekshe metrge jýyǵy sharýashylyq-aýyz sýmen jabdyqtaýǵa, 2,4 mln tekshe metri óndiristik-tehnıkalyq sýmen jabdyqtaýǵa, 19,6 mln tekshe metri jer sýarýǵa arnalǵan, – dedi Talǵat Momyshev.
Vıtse-mınıstrdiń málimetinshe, naqty paıdalaný kólemi táýligine shamamen 1,5 mln tekshe metr nemese bekitilgen qordyń 3,5%-yn ǵana quraıdy. Al jerasty sýlaryn sýarý maqsatynda paıdalaný deńgeıi 2%-dan tómen.
Jerasty sýlarynyń boljamdy resýrstary táýligine 176,1 mln tekshe metrdi quraıdy. Bul barlanǵan paıdalaný qorynan tórt eseden astam kóp.
Mınıstrlik óńirlerdiń áleýmettik-ekonomıkalyq damý keleshegin eskere otyryp, jerasty sýlaryn izdeý jáne baǵalaý jumystaryn júıeli júrgizip keledi. Bul qorlardy kezeń-kezeńimen zertteýge, baǵalaýǵa jáne sharýashylyq aınalymǵa tartýǵa múmkindik beredi.
– Osy baǵytta 2024 jyly mınıstrlik janynan Ulttyq gıdrogeologııalyq qyzmet quryldy. Qyzmet jerasty sý qorlaryn izdeý jáne baǵalaý, ıesiz ózdiginen tógiletin gıdrogeologııalyq uńǵymalardy joıý jáne konservatsııalaý, jerasty sýlaryna monıtorıng júrgizýmen aınalysady. Sondaı-aq sýarmaly jerlerdiń melıoratsııalyq jaı-kúıin baqylap, baǵalaıdy, – dedi ol.
Aıta keteıik, buǵan deıin jerasty sýyn sýarý úshin paıdalanatyn sharýalarǵa salyq júktemesin azaıtý usynylǵany habarlanǵan edi.
