Elimizde jerasty sýyn keshendi paıdalaný jáne basqarý tujyrymdamasy ázirlenip jatyr
ASTANA. KAZINFORM – Sý resýrstary jáne ırrıgatsııa mınıstrliginiń Jerasty sýy departamenti 2027-2040 jyldarǵa arnalǵan Jerasty sýyn keshendi paıdalaný jáne basqarý tujyrymdamasyn ázirlep jatqanyn habarlady.
Búginde vedomstvoaralyq jumys toby qurylyp, saraptamalyq talqylaýlar júrgizildi jáne memlekettik organdar men sala mamandarynyń usynystaryn eskere otyryp, eskertýler pysyqtaldy. Aldaǵy kezeńde tujyrymdama jobasyn jarııalap, múddeli memlekettik organdarmen kelisý josparlanyp otyr.
Tujyrymdama jerasty sý resýrstaryn basqarýdyń zamanaýı júıesin qalyptastyrýǵa baǵyttalǵan. Qujatty iske asyrý jerasty sýyn ıgerý tıimdiligin arttyrýǵa, eldi mekender men ekonomıka salalaryn utymdy ári turaqty sýmen qamtamasyz etýge, sondaı-aq sý qoryn saqtaý men tolyqtyrýǵa múmkindik beredi.
– Búginde Qazaqstandaǵy jerasty sýy zerttelgenimen, olardy jan-jaqty zerdeleý deńgeıi áli de jetkiliksiz. Bolashaǵy zor kóptegen ýchaskede qosymsha gıdrogeologııalyq zertteýler júrgizý, qorlardy qaıta baǵalaý jáne qosymsha barlaý jumystaryn atqarý qajet. Bul olardyń naqty áleýetin obektıvti baǵalaýǵa múmkindik beredi. Osyǵan baılanysty biz Jerasty sýyn keshendi paıdalaný jáne basqarý tujyrymdamasyn ázirleýge kiristik. Memlekettik balans derekterine sáıkes, elimizdegi jerasty sýynyń paıdalanýǵa jaramdy qory táýligine 43,2 mln tekshe metr. Alaıda qazirgi tańda onyń nebári shamamen 1,5 mln tekshe metri, ıaǵnı jalpy kólemniń 3,6 paıyzy ǵana paıdalanylyp otyr, – dedi Sý resýrstary jáne ırrıgatsııa vıtse-mınıstri Talǵat Momyshev.
Atyraýda jerasty tuzdy sýy kóterilip, úsh iri saıabaqtyń qurylysy toqtaǵanyn jazǵan edik.
