Elimizde jer úıdi tótenshe jaǵdaıdan saqtandyrý mindettelmek

ASTANA. KAZINFORM — Birqatar óńirde jer úılerdi tótenshe jaǵdaıdan saqtandyrý mindeti engizilmek. Bul týraly Úkimet basshysynyń orynbasary Qanat Bozymbaev málim etti.

— Qazir Azııalyq damý banki jáne dúnıejúzilik bankpen bul jobany ázirlep jatyrmyz, ıaǵnı tótenshe jaǵdaıda jer úılerdi saqtandyrýdy engizý. Kim qansha tóleıdi, qazir belgisiz, óıtkeni, esep júrgiziledi, múmkin 5 myń teńge, múmkin nashar úı bolsa, jylyna 1 myń teńge tóleıdi. Biraq, sýdyń astynda qalsa, jer silkinisi bolsa, ótemaqyny saqtandyrý arqyly ala alady, — dep jaýap berdi Qanat Bozymbaev Úkimet úıinde ótken baspasóz máslıhatynda.

Onyń aıtýynsha, qazir jer úılerdi saqtandyrý máselesi sarapshylarmen talqylanyp jatyr. 

— Eshqandaı shý-daý kútilmeıdi, óıtkeni, úlken, qymbat jer úıdiń ıesi jylyna 50 myń teńge kóp emes, al aýyldaǵy qarapaıym jer úıge jylyna 1-2 myń teńge bolady, odan joǵary bolmaıdy dep oılaımyn, kóp bolsa 5 myń teńgege shyǵady. Bul mindetti bolady, biraq tek tótenshe jaǵdaılar qaýpi bar óńirlerde ǵana, — dep tolyqtyrdy vıtse-premer.

Buǵan deıin Qanat Bozymbaev Aqtaý mańyndaǵy ushaq apatynyń saldaryn anyqtaý jumysyna qatysty sońǵy málimetpen bólisken edi.