Elimizde jeńil ónerkásipti damytýdyń keshendi jospary ázirlenip jatyr
ASTANA. KAZINFORM – Sońǵy 5 jylda elde jeńil ónerkásip salasynda 3 myń jańa jumys orny ashylyp, 40-tan astam joba iske qosyldy. Salanyń damýy týraly tolyǵyraq Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andakov aıtyp berdi.
- Jeńil ónerkásip salasy – halyqty jumyspen qamtýǵa jáne ómir súrý sapasyn jaqsartýǵa yqpal etetin ekonomıkanyń mańyzdy salalarynyń biri. Kóptegen qıyndyqqa qaramastan, bul sala damýyn jalǵastyryp, ekonomıkalyq jáne áleýmettik úderisterge úlesin qosyp keledi, - dedi Muhamed Andakov elordada ótken jeńil ónerkásip ulttyq birlestiginiń 10 jyldyǵyna arnalǵan ІІ sezinde.
Mınıstrlik ókiliniń málimdeýinshe, ónerkásiptik saıasattyń negizgi maqsaty — shıkizattyq damý modelinen ishki óndiristi arttyrýǵa kóshý.
- Atalǵan maqsat – ınvestıtsııa tartý, jobalardy iske asyrý jáne júıeli sharalardy oryndaý arqyly júzege asyrylyp jatyr. Jeńil ónerkásipti damytý boıynsha júıeli jumystyń sabaqtastyǵyn qamtamasyz etý jáne jalǵastyrý maqsatynda qazir Qazaqstan Respýblıkasynyń 2026 - 2030 jyldarǵa arnalǵan jeńil ónerkásipti damytý jónindegi keshendi jospary ázirlenip jatyr, - dep tolyqtyrdy ol.
Sondaı-aq spıker sońǵy 5 jylda elde jeńil ónerkásip salasynda 3 myń jańa jumys orny qurylyp, 40-tan astam joba iske qosylǵanyn tilge tıek etti.
Aıta keteıik, bıyl jeńil ónerkásip salasynda 9 iri ınvestıtsııalyq joba iske asyrylady.
Búgin elordada Qazaqstannyń jeńil ónerkásip ulttyq birlestiginiń 10 jyldyǵyna arnalǵan ІІ sezi ótti.