Elimizde jemqordyń týystarynyń da múlkin tárkileý usynyldy

ASTANA. KAZINFORM – Elimizde sybaılas jemqorlyq qylmysyn jasaǵan kúdiktiniń týystarynyń da múlki tárkilenýi múmkin. Bul jazadan aman qalý úshin aıyptynyń jaqyndary óz múlkiniń zańdy jolmen alynǵanyn dáleldeı alýy kerek. Tıisti usynysty Májilis depýtaty Marat Báshimov Bas prokýror Berik Asylovqa joldady. 

— Jaqynda aqshany jylystatýǵa qarsy mańyzdy zań jobasy Májilistiń birinshi oqylymyna shyǵarylady. Oǵan FATF (Aqshany jylystatýǵa qarsy kúres úshin qarjylyq amaldardy ázirleýshi top — red.) halyqaralyq uıymy usynǵan 100 quqyqtyq norma engizildi. Bizdiń elimiz úshin «keńeıtilgen tárkileý» ınstıtýty asa mańyzdy. Álemde dál bizdegideı urlyq kólemi bolmaǵan. Sondyqtan men Bas prokýror Berik Asylovqa osy másele boıynsha qoldaý kórsetý týraly hat joldadym, — dep jazdy májilismen Facebook-tegi paraqshasynda. 

Depýtattyń aıtýynsha, álem elderiniń túgelge jýyǵy FATF — halyqaralyq kóleńkeli ekonomıka jáne aqshany jylystatýmen kúres uıymynyń usynymdaryn zańnamaǵa engizgen. Al Qazaqstanda olıgarhtardyń lobbısteri bul jańashyldyqty tejep, túrli syltaýmen kedergi keltirip keledi.

— Qazirgi tańda bul norma bolmaǵandyqtan jáne baılyǵy úshinshi tulǵalarǵa rásimdelgendikten kóptegen kúdikti jaýapkershilikten qutylyp ketip jatyr. Osylaısha olardyń múlki tolyq tárkilenbeıdi, al sottalǵandar bolashaqta úshinshi tulǵalarǵa, ıaǵnı týystaryna, kóńildesterine jazylǵan múlik pen qarjyny paıdalanyp, jaıbaraqat ómir súredi, — dep jazady Báshimov.

Onyń sózinshe, «keńeıtilgen tárkileý» jazasy tek múlkin zańdy túrde tapqanyn dáleldeı almaıtyn adamǵa qoldanylady.

— Usynylatyn mehanızm mynadaı: aldyn ala tergeýge alynǵan adamnan basqa múlkin zańdy jolmen alǵanyn dáleldeýdi talap etiledi. Eger dáleldeı almasa, ol múlik tárkilenedi, — delingen jazbada.

Odan bólek, depýtat bul normanyń qoldanylý aıasyn tek belgili bir memlekettik jáne saıası qyzmetshilermen, sondaı-aq memlekettik uıymdarda ákimshilik-basqarýshylyq jáne sharýashylyq-fýnktsıonaldyq mindetter atqaratyn adamdarmen shekteý qajet ekenin atap ótken.

Aıta keteıik, jýyrda Prezıdent sógisinen keıin Kólik mınıstrligi sybaılas jemqorlyq táýekelderine taldaý júrgizetinin jazǵan edik.