Elimizde jekemenshik mektepterge arnalǵan memtapsyrystyń jańa júıesi iske qosyldy
ASTANA. KAZINFORM – Qazaqstanda jekemenshik mektepterde memlekettik bilim berý tapsyrystaryn ornalastyrýdyń jańa tetigine baılanysty qanatqaqty joba iske qosyldy. Bul týraly Oqý-aǵartý mınıstrliginiń baspasóz qyzmeti habarlady.
Oqý-aǵartý mınıstrligi men oblystardyń, Almaty, Astana jáne Shymkent qalalary ákimdikteriniń birlesken buıryǵymen «2025-2026 oqý jylyna arnalǵan jekemenshik bilim berý mekemelerinde orta bilim berýge baılanysty memlekettik bilim berý tapsyrystaryn ornalastyrýdyń jańa tetigi» pılottyq jobasy bekitildi. Atalǵan joba qarjylandyrýdyń ashyqtyǵyn arttyrýǵa, memlekettik-jekeshelik áriptestikti damytýǵa jáne barlyq balany sapaly bilimmen qamtamasyz etýge baǵyttalǵan.
Keıingi jyldary elimizde jekemenshik mektepterdiń sany shamamen myńǵa jýyqtap qaldy. Bilim salasyndaǵy jeke bıznestiń ulǵaıýy jaqsy úrdis. Alaıda qazir memlekettik tapsyrysty alý tártibi jańartý men jetildirýdi qajet etedi.
Júrgizilgen taldaý jumystarynyń nátıjesinde jekemenshik mektepterdegi oqýshylardy esepke alý men qarjylandyrý boıynsha sáıkessizdikter anyqtaldy. Ulttyq bilim berý derekqorynda memleket esebinen qarjylandyrylatyn oqý ornynda tirkelgen balalardyń is júzinde múldem basqa mektepte oqıtyny belgili boldy. Al jekelegen óńirlerde keıbir mektepter oqýdan shyǵyp ketken oqýshylar úshin de aqsha alyp otyrǵan. Sondaı-aq bilim berý qyzmetine qatysy joq memlekettik satyp alý júıesinde tirkelgen uıymdar anyqtaldy. Munyń barlyǵy júıege reforma qajet ekenin baıqatyp otyr.
Túıitkildi máselelerdi sheshý maqsatynda Qarjy mınıstrligine qarasty «Aqparattyq-esepteý ortalyǵy» AQ jańa aqparattyq júıeni ázirledi. Atalǵan tehnologııa E-Qazyna.kz platformasyna engizilgen jáne paıdalanýshylardyń jumysyn jeńildetýmen qatar bul derekterdiń durystyǵyn baqylaýdy kúsheıtedi. Júıede oqýshylardyń sany men kontıngenti, ruqsat qujattarynyń bar-joǵy avtomatty túrde tekserilip, bilim berý salasyndaǵy aqparattyq júıelermen birtutas bolady. Biryńǵaı ákimshilik basqarýdy qamtamasyz etý úshin «Qarjy ortalyǵy» AQ Qarjy mınıstrliginiń qaramaǵyna berildi. Ortalyq qanatqaqty jobanyń operatory retinde uıymdastyrý-ádistemelik qoldaýdy júzege asyryp, qatysýshylarǵa keńes berý, monıtorıng júrgizý, qabyldanǵan aktilerge sáıkes tólem júrgizý qyzmetterin atqarady.
Osy jobany iske asyrýdaǵy negizgi ról jergilikti atqarýshy organdarǵa – bilim berý basqarmalaryna júktelip otyr, olar memlekettik tapsyrystardy ornalastyryp, qorytyndy esepterdi bekitedi, sondaı-aq kelisimsharttar jasap, www.e-Qazyna.kz veb-portaly arqyly kórsetilgen qyzmetter týraly aktilerdi qabyldaıdy.
Kelesi kezeńde bul júıege bilim berý salasyndaǵy basqa da memlekettik qarjylandyrý quraldaryn – granttardy, shákirtaqylardy, jataqhanada oryndarmen qamtamasyz etý jáne basqa da qoldaý túrlerin biriktirý kózdelgen.
Jańa aqparat júıesi 12 qarashada iske qosyldy. Bilim berý qyzmetterine tsıfrlandyrýdy engizý – memlekettik satyp alýlar qyzmetindegi bıýdjet qarajatynyń ashyqtyǵyn arttyryp, túsinikti etýdi kózdeıdi jáne ýaqtyly, oryndy qarjylandyrýdyń ákimshilik qadaǵalaýyn qamtamasyz etedi. Bul jańashyldyq bıýdjetke túsetin júktemeni azaıtyp, básekelestikti arttyrady jáne bilim berý salasyna jeke ınvestıtsııany kóbirek tartýǵa áser etedi.
Eske salsaq, buǵan deıin elordalyq mektepte oqýshylardyń qaýipsizdigi men tártibin jasandy ıntellekt baqylaıtynyn jazǵanbyz.