Elimizde jeke sot oryndaýshylarynyń sany qansha
ASTANA. KAZINFORM — Búgin Parlament Májilisinde Úkimet saǵatynda QR Ádilet mınıstri Erlan Sársembaev sot oryndaýshylar salasyn jetildirýge qatysty túsinik berdi.
— Májbúrlep oryndatý — Ádilet mınıstrliginiń negizgi baǵyttarynyń biri jáne sot tóreligin júzege asyrýdyń sońǵy satysy retinde tıimdi, jedel jáne ádil bolýy qajet. Búgingi tańda atqarýshylyq qujatty oryndaý memlekettik jáne jeke sot oryndaýshylaryna júktelgen. Jeke sot oryndaýshylar ınstıtýtyn engizý kezinde májbúrlep oryndatý júıesi uqsas elderdiń (Frantsııa, Germanııa, Belgııa, Nıderlandy) tájirıbesi eskerildi. Jeke oryndaý ınstıtýtyn engizýmen birge, osy salany tsıfrlandyrý nátıjesinde oryndaýdyń tıimdiligi edáýir artty. Eger 2010 jyly bir sot oryndaýshysy (memlekettik qyzmetshi) jylyna orta eseppen 270 qujatty tolyq kólemde oryndasa (jeke oryndaý ınstıtýtyn engizgenge deıin), 2024 jyly aqparattyq júıeniń múmkindikterin keńeıtý arqasynda bir jeke sot oryndaýshysy 1 229 qujatty tolyq kólemde nemese 5 ese kóp oryndaǵan. Sondaı-aq, balamaly oryndaýdy engizýdiń artyqshylyǵy memlekettiń atqarýshylyq júıeni qarjylandyrýǵa jumsalatyn shyǵystaryn memlekettik sot oryndaýshylar shtatyn ońtaılandyrý jolymen (jyl saıyn shamamen 1,5 mlrd teńge) tómendetýi boldy, — dedi E. Sársembaev.
Onyń aıtýynsha, qazir jeke sot oryndaýshylardyń sany 2 101 adamdy qurady, al olardyń eńbekaqysy óndirilgen somanyń paıyzynan quralady.
— 2015 jyl men 2024 jylǵa deıingi kezeńde atqarýshylyq qujattar tizbesi 10-nan 17-ge deıin ulǵaııýy atqarýshylyq qujattar sanyn kóbeıtti (2021 j. — 6,7 mln, 2022 j. — 7,8 mln, 2023 j. — 9,1 mln, 2024 j. — 9,2 mln). Byltyr oryndaýda 13,5 trln teńgeni quraıtyn 9,2 mln atqarýshylyq qujat boldy. Óndirip alýshylarǵa ótelgen somasy 469 mlrd teńgeni qurady. Atqarýshylyq qujattar boıynsha memleket paıdasyna 57,7 mlrd teńge óndirildi. Respýblıkalyq bıýdjetke óndirilgen atqarýshylyq sanktsııa 2,4 mlrd teńgeni qurady, — dedi mınıstr.
Budan buryn habarlanǵandaı, Ádilet mınıstrligi tsıfrlyq sot oryndaýshy júıesiniń alǵashqy nátıjelerin tanystyrdy.