Elde jeke kómekshi qyzmetiniń aqysy men kórsetý tártibi bekitildi

Jeke kómekshi qyzmeti múgedektigi bar adamǵa kúndelikti qajetti jerlerine barýyna, túrli jumystaryn atqarýyna jáne óz betinshe júrip-turýyna kómektesýge baǵyttalǵan.

Qyzmet kórsetý úshin úsh tarap arasynda kelisimshart jasalady. Oǵan múgedektigi bar adam, jeke kómekshi jáne jergilikti atqarýshy organ qatysady. Kelisimshartta qyzmettiń qalaı kórsetiletini, sondaı-aq ár taraptyń quqyqtary men mindetteri jazylady.

Maman tek naqty kórsetken qyzmeti úshin aqy alady. Bir qyzmettiń quny AEK mólsheriniń 54,56%-yna teń. Bir rettegi qyzmet kórsetý ýaqyty 4 saǵattan aspaýy kerek. Bir aı ishinde 60 qyzmetke deıin kórsetýge bolady.

Bul rette jergilikti atqarýshy organdar óńirdiń ereksheligi men bıýdjet múmkindigine qaraı kórsetiletin qyzmet sanyn qaıta qaraýy múmkin.

Jeke kómekshiniń eńbekaqysy «Azamattarǵa arnalǵan úkimet» memlekettik korporatsııasy arqyly avtomatty túrde tólenedi. Qarajat qyzmettiń naqty kórsetilgenin rastaıtyn aktige sáıkes aýdarylady.

Qyzmet kórsetiletin kún men ýaqytty múgedektigi bar adam jeke kómekshimen ózara kelisedi. Azamat ózine yńǵaıly kesteni aldyn ala belgileı alady.

Qyzmet alýshy jumys sapasyn baǵalaýǵa quqyly. Eger kómek tolyq kórsetilmese nemese qyzmet sapasyna qatysty negizdi shaǵymy bolsa, azamat oryndalǵan jumys aktisine qol qoımaı, tıisti shaǵymyn bere alady.

Al jeke kómekshi óz jumysyn ózi uıymdastyrady. Onyń mindeti — kelisimshartta kórsetilgen qyzmetterdi ýaqytynda ári sapaly oryndaý.

Eger kelisimshart talaptary saqtalmasa, atqarylǵan jumys úshin aqy tólenbeıdi. Sondaı-aq adamǵa jeke kómekshi qajet emes dep belgilengen jaǵdaıda da tólem qarastyrylmaıdy.

Úsh tarap arasyndaǵy kelisimshart osy baǵytta jumys isteıtin barlyq mamanǵa qoldanylady. Onyń ishinde buǵan deıin de osyndaı jumysty atqaryp júrgender de bar.

Aıta ketelik múgedektik nege bir jylǵa, bes jylǵa nemese merzimsiz beriletini týraly jazǵan edik.