Elimizde jazǵy týrıstik maýsym qorytyndylandy

ASTANA. KAZINFORM — Búgin Týrızm jáne sport mınıstri Erbol Myrzabosynovtyń tóraǵalyǵymen ótken keńeste jazǵy týrıstik maýsymnyń qorytyndysy shyǵaryldy. Jıynǵa oblys ákimderiniń orynbasarlary men óńirlik basqarma basshylary qatysty. Bul týraly vedomstvonyń baspasóz qyzmeti málim etti. 

— Bıyl týrızm taqyryby birneshe ret kóterilip, keńinen talqylandy. Ókinishke qaraı, árdaıym oń nátıje bola bermedi. Memleket basshysy kýrortty óńirlerdi jazǵy týrıstik maýsymǵa daıyndyq deńgeıiniń qanaǵattanarlyqsyz ekenin atap ótti. Prezıdenttiń tapsyrmasy boıynsha birqatar kýrortty óńirge tekseris júrgizildi. Nátıjesinde qajetti jaǵdaılardy uıymdastyrýda eleýli kemshilikter bar ekenin anyqtaldy, — dedi mınıstr.

Bıyl elimizdiń segiz iri demalys aımaǵynda, atap aıtqanda, Baıanaýyl, Katonqaraǵaı, Kaspıı teńizi jaǵalaýy, Balqash pen Alakól kólderi (Alakóldiń Abaı jáne Jetisý oblystaryndaǵy jaǵalaýy), Qapshaǵaı jáne Şýche-Býrabaı kýrortty óńirlerinde keshendi túgendeý júrgizildi. Taldaý nátıjesinde ınjenerlik ınfraqurylymnyń jetkiliksizdigi, beıbereket saýdany retteý, jaǵajaılardy aımaqtarǵa bólý, elektrmen úzdiksiz jabdyqtaý, qaýipsizdik erejelerin qatań saqtaý jáne qutqarý beketteriniń sanyn kóbeıtý qajet ekeni belgili boldy. 

Taldaý qorytyndysy boıynsha, qutqarýshylar sanyn arttyrý, qutqarý beketterin zamanaýı jabdyqpen qamtý, ınspektorlardyń turaqty kezekshiligin uıymdastyrý jáne sý kóligine baqylaýdy kúsheıtý usynyldy.

Memleket basshysynyń tapsyrmasyn oryndaý maqsatynda mınıstrlik 2025-2028 jyldarǵa arnalǵan kýrortty óńirlerdi damytý jónindegi Jol kartasynyń jobasyn ázirledi. Jobaǵa 141 is-shara engizilgen. Sondaı-aq jobany júzege asyrý respýblıkalyq jáne jergilikti bıýdjetterden jáne jeke ınvestıtsııa esebinen qarjylandyrý kózdelgen.

Keńes 25 qyrkúıekte Mańǵystaý oblysynda ótetin Halyqaralyq týrıstik forým aıasynda uıymdastyryldy.

Aıta keteıik, jyl basynan beri ulttyq parkterge 2 mıllıonǵa jýyq týrıst bardy.