Elimizde jazǵy demalys oryndarynda balalardyń neshe paıyzy qamtylady

ASTANA. KAZINFORM – Oqý-aǵartý mınıstrligi 3 mln-nan astam bala jazǵy saýyqtyrý ortalyqtarynda demalatynyn jarııalady.

«Memleket basshysynyń balalardy saýyqtyrýǵa arnalǵan 50 ortalyqty iske qosý jónindegi tapsyrmasy aıasynda osy jyly Abaı, Atyraý, Qostanaı, Jetisý oblystarynda jáne Astana qalasynda jalpy 5 jańa ortalyqty ashý josparlanǵan. Jazǵy maýsymda 10 myńnan astam saýyqtyrý ortalyǵy jumys isteıdi, olarda 92% nemese 3 mln-nan astam oqýshy jazǵy saýyqtyrýmen, demalyspen qamtylmaq», - delingen mınıstrliktiń Kazinform agenttigine bergen jaýabynda.

Vedomstvo málimetinde, osy maqsatta mınıstrlik demalys ortalyqtarynyń árbir túrine qatysty biryńǵaı talaptardy qamtıtyn ádistemelik usynymdar jınaǵy ázirlenip, ákimdikterge joldady. Jınaqta jazǵy demalysty sapaly uıymdastyrýǵa qajet barlyq normatıvtik-quqyqtyq akti qamtylǵan. Jazǵy saýyqtyrý lagerleri óńirdegi qajet deńgeıge sáıkes jergilikti bıýdjet esebinen qarjylandyrylady.

«Qazir jergilikti atqarýshy organdardyń málimeti boıynsha 3 mln-nan astam (tegin, aqyly negizde) bala jazǵy saýyqtyrý ortalyqtarynda demalatyn bolady. Tegin lagerlermen memlekettik ataýly áleýmettik kómek alýǵa quqyǵy bar otbasylardan, sondaı-aq jan basyna shaqqandaǵy ortasha tabysy eń tómengi kúnkóris deńgeıinen tómen ári memlekettik ataýly áleýmettik kómek almaıtyn otbasylardaǵy oqýshylar, jetim balalar, ata-anasynyń qamqorlyǵynsyz qalǵan otbasylarda turatyn balalar jáne ózge de sanattary qamtylady», - dep atalyp ótken Oqý-aǵartý mınıstrligi aqparatynda.

Eske salsaq, jaqynda Májilis depýtaty Elnur Beısenbaev elimizdegi balalardyń jazǵy demalys oryndaryn synǵa aldy.

«Ashyǵyn aıtý kerek, balalardyń jazǵy demalyspen qamtylýy týraly statıstıka kókeıge qonbaıdy. Óıtkeni, jergilikti ákimdikter mektep janyndaǵy lagerlerdi jazǵy lager dep esepteıdi. Atap aıtqanda, mektep janyndaǵy lagerler – jazǵy demalys emes. Ol tek qana 5-6 saǵat ýaqyt ótkizýge arnalǵan», - dedi depýtat.