Elimizde jaıylym tapshylyǵy 3,5 mln gektarǵa qysqardy
ASTANA. KAZINFORM - Bul týraly Astanada Aýyl sharýashylyǵy mınıstri Aıdarbek Saparovtyń tóraǵalyǵymen vedomstvo alqasynyń otyrysynda málim boldy, dep habarlaıdy QR Aýyl sharýshylyǵy mınıstrliginiń baspasóz qyzmeti.
Otryysta Jer resýrstaryn basqarý komıtetiniń tóraǵasy Murat Temirjanov tozǵan jerlerdi qalpyna keltirý, jerlerdi aýyl sharýashylyǵy aınalymyna tartý jáne jer salasyn tsıfrlandyrý baǵytyndaǵy jumystar týraly baıandady.
Aıtýynsha, búginde elimizde aýyl sharýashylyǵy alqaptaryn tsıfrlandyrý 100 paıyz aıaqtalǵan. Egistik, jaıylym jáne shabyndyq jerlerdiń túrleri boıynsha tsıfrlyq kartalar jasalǵan.
Kelesi kezeńde Jer resýrstaryn basqarýdyń biryńǵaı tsıfrlyq platformasy qurylady.
-2027 jylǵa qaraı platforma júıesine jasandy ıntellekt tehnologııalaryn engizýdi josparlap otyrmyz. Jasandy ıntellekt paıdalanylmaı jatqan jerlerdi avtomatty túrde anyqtaýǵa, tozǵan aýmaqtardy belgileýge, topyraq erozııasy men tuzdaný úderisterin taldaýǵa, sondaı-aq ónimdilikti boljaýǵa jáne tyńaıtqyshtarǵa degen qajettilikti dál esepteýge múmkindik beredi, – dedi komıtet tóraǵasy.
Sonymen qatar mınıstrlik topyraqtaǵy kómirtek mólsherin baqylaý júıesin engizý boıynsha pılottyq jobany ázirlep jatyr. Bul kómirtek quramynyń ózgerisin baqylaýǵa, egistik ónimdiligin arttyrýǵa jáne Qazaqstannyń agroónerkásiptik keshenine «jasyl» ınvestıtsııalar tartýǵa jańa múmkindikter ashady.
Paıdalaný kezinde Jer zańnamasyn buzǵan oqıǵalar boıynsha jerlerdi memleket menshigine qaıtarý jumystary da júrip jatyr.
-2022 jyldan beri memleket menshigine 15 mln gektar jer qaıtarylyp, onyń 11,3 mln gektary qaıta bólindi. Sonyń ishinde 4,2 mln gektar jer ortaq paıdalanýǵa berildi. Nátıjesinde jaıylym tapshylyǵy 3,5 mln gektarǵa deıin qysqardy,-delingen habarlamada.
Alqa otyrysynyń qorytyndylaǵan Aıdarbek Saparov topyraq erozııasymen kúres jónindegi Jol kartasyn iske asyrýdy jandandyrý jáne aýyldyq eldi mekender mańyndaǵy jaıylymdardy basqarýdyń ózekti josparlaryn bekitý boıynsha birqatar tapsyrmalar berdi.
Oblys ákimdikterine memleket menshigine qaıtarylǵan aýyl sharýashylyǵy jerlerin tolyq kólemde aınalymǵa engizý, ósimdik sharýashylyǵymen aınalysatyn iri jer paıdalanýshylardy mal sharýashylyǵyn damytýǵa tartý arqyly aýyl turǵyndaryn eńbekpen qamtý jumystaryn kúsheıtý tapsyryldy.
Alqa otyrysyna QR AShM-ge qarasty uıymdardyń basshylary, oblystar men Shymkent qalasy ákimderiniń orynbasarlary, oblystyq aýyl sharýashylyǵy, veterınarııa jáne balyq sharýashylyǵy basqarmalarynyń basshylary, jer resýrstaryn basqarý departamentteriniń jáne mınıstrliktiń aýmaqtyq bólimsheleriniń jetekshileri qatysty.
Osyǵan deıin habarlaǵanymyzdaı, elimizde ár 3-5 jyl saıyn topyraqty mindetti zertteý usynyldy.
