Elimizde jastarǵa aqshalaı grant berýge arnalǵan eki jobaǵa ótinim qabyldaý bastaldy
Mádenıet jáne aqparat mınıstrligi «Zhas Project» jobasy aıasynda shaǵyn granttar konkýrsyna ótinimder qabyldaý bastalǵanyn jarııalady, dep habarlaıdy Kazinform agenttigi.
Mádenıet jáne aqparat mınıstrligi Jastar jáne otbasy isteri komıteti tóraǵasynyń orynbasary Rollan Quspannyń aıtýynsha, «Zhas project» jobasy jastarǵa qoǵamǵa paıdaly kez kelgen ıdeıalardy iske asyrýda qoldaý kórsetedi. Baǵdarlama jas urpaqty turǵylyqty jerlerdegi áleýmettik-ekonomıkalyq ómirge tartýǵa,
shalǵaıdaǵy eldi mekenderge basymdyq berýge baǵyttalǵan.
«Joba elimizdiń barlyq óńirinde iske asyrylady. Qujattar 9-22 qazan aralyǵynda qabyldanady. Osy oraıda 18 jastan 35 jasqa deıingi jastarǵa qoldaý jasalady», - dedi R. Quspan Ortalyq kommýnıkatsııalar qyzmetindegi baspasóz máslıhatynda.
Joba aıasynda jyl saıyn 280 shaǵyn grant bólinedi. Bir adamǵa arnalǵan grant somasy 1 mıllıon teńgege deıin bolady. Ótinimder qabyldanatyn ınternet-resýrstar týraly aqparatty cisc.kz saıtynan, sondaı-aq Azamattyq bastamalardy qoldaý ortalyǵynyń áleýmettik jelilerdegi resmı paraqshalarynan alýǵa bolady.
«Budan bólek, mınıstrlik júzege asyryp jatqan taǵy bir joba «Táýelsizdik urpaqtary» dep atalady. 2021 jyldan bastap Memleket basshysynyń bastamasymen jyl saıyn jastarǵa 3 mln teńgege deıingi somada «ǵylym», «mádenıet», «aqparattyq tehnologııalar», «bıznes» jáne «medıa» baǵyttary boıynsha «Táýelsizdik urpaqtary» granty tabystalyp keledi. Osy oraıda 14 jastan 35 jasqa deıingi jas azamattar úmitker bola alady. Bıyl 26 qyrkúıekten bastap bul grant boıynsha konkýrsqa ótinimder qabyldaý bastaldy jáne osy is-shara eki aıǵa jalǵasady», - dedi komıtet ókili.
Konkýrs týraly tolyq aqparatpen Mádenıet jáne aqparat mınıstrliginiń resmı saıtynda, sondaı-aq vedomstvonyń áleýmettik jelilerdegi paraqshalarynda tanysýǵa bolady.
