Elimizde «jasyl» energetıkanyń qýaty 17 esege artqan

ASTANA. KAZINFORM – Qazaqstanda «jasyl» energetıkanyń qýaty 17 esege artty. Bul týraly EM Jańartylatyn energııa kózderi departamentiniń dırektory Jaslan Qasenov aıtty. 

— Qazaqstanda jańartylatyn energııa kózderi (JEK) salasynda aıtarlyqtaı ósim baıqalady: sońǵy on jylda eldegi JEK nysandarynyń jalpy ornatylǵan qýaty 17 eseden astamǵa artyp, 3082 MVt-qa jetti. Búgingi tańda «jasyl» generatsııa eldegi jalpy elektr energııasy óndirisiniń 6,43%-yn qamtamasyz etip otyr, - dedi ol Power Central Asia + China óńirlik energetıkalyq forýmynda.

Sondaı-aq spıker Mundaı qarqyndy damý – ekologııalyq taza, turaqty jáne ekonomıkalyq turǵydan tıimdi energetıkalyq júıeni qalyptastyrýǵa baǵyttalǵan memlekettik saıasattyń naqty nátıjesi ekenin atap ótti.

— 2018 jyldan bastap Qazaqstanda iske qosylǵan ashyq aýktsıondyq mehanızm aıasynda 13 elden 260-qa jýyq kompanııa tartyldy. Bul tek qýat kózderin arttyryp qana qoımaı, sonymen qatar «jasyl» elektr energııasynyń tarıfterin de edáýir tómendetýge múmkindik berdi: jel elektr stantsııalaryna – shamamen 2 esege, kún elektr stantsııalaryna – 2,5 esege deıin, - dedi departament basshysy.

Onyń aıtýynsha, ınvestorlar úshin eń tartymdy sharttar jasalǵan.Máselen 20 jylǵa deıingi elektr energııasyn satyp alý kelisimsharttary, tarıfterdi ındeksteý, sondaı-aq ınvestıtsııalyq preferentsııalar qarastyrylǵan.

Aıta keteıik, buǵan deıin munaı-gaz hımııasyn damytý salasynda 15 mlrd dollardyń 6 jobasy júzege asqanyn jazǵan edik.