Elimizde jasyl energetıkany damytý tujyrymdamasy ázirlenip jatyr
ASTANA. KAZINFORM- Qazaqstanda energııa jınaqtaý júıeleri týraly zań jobasy qaralyp, uzaq merzimdi perspektıvaǵa arnalǵan jasyl energetıkany damytý tujyrymdamasy ázirlenip jatyr. Bul týraly «Go Net Zero – Ortalyq Azııa jáne Kaspıı» bıznes-sammıti aıasynda Energetıka mınıstrliginiń Jańartylatyn energııa kózderi departamentiniń dırektory Turar Álimjan málimdedi.
Sammıt barysynda óńirdiń energetıka salasyn dekarbonızatsııalaý, ıaǵnı óndirý men óńdeýden bastap elektr energııasyn óndirý men berýge deıingi baǵyttardyń perspektıvalary talqylandy.
Energetıka mınıstrliginiń atynan quttyqtaý sóz sóılegen Turar Álimjan óńir elderin ortaq tarıh pen mádenı baılanystar ǵana emes, ortaq energetıkalyq júıeler, sý resýrstary jáne turaqty damý aldyndaǵy ortaq jaýapkershilik biriktiretinin atap ótti.
Qazirgi tańda óńir energetıka salasynda túbegeıli transformatsııa kezeńinen ótip jatyr.
Qazaqstan, Ázerbaıjan jáne Ózbekstan jańartylatyn energııa kózderi, energııa jınaqtaý júıeleri jáne tómen kómirtekti tehnologııalar ónerkásiptik egemendiktiń negizine aınalatyn jańa energetıkalyq modeldi qalyptastyrý baǵytynda kúsh-jigerin úılestirip keledi.
Óńirlik kún tártibindegi negizgi máselelerdiń biri – básekege qabilettilikti jáne asa mańyzdy ınfraqurylymǵa baqylaýdy saqtaı otyryp, turaqty ári táýelsiz energetıkalyq júıeni qalyptastyrý. Bul úshin energetıkalyq jelilerdi jańǵyrtý, energııa jınaqtaý júıelerin engizý, retteýshi tetikterdi jetildirý, sondaı-aq halyqaralyq klımattyq standarttarmen tásilderdi úılestirý qajet.
Sammıt barysynda Ortalyq Azııa – Ázerbaıjan – Eýropa «jasyl» energetıka dálizin damytýǵa erekshe nazar aýdaryldy. Atalǵan joba praktıkalyq iske asyrý kezeńine ótip, óńirlik energetıkalyq yntymaqtastyqtyń perspektıvaly baǵyttarynyń biri retinde qarastyrylyp otyr.
Qazaqstan jańartylatyn energetıkanyń áleýetin júıeli túrde arttyryp keledi. Elektr energetıkasy salasyn 2035 jylǵa deıin damytý jónindegi bekitilgen is-sharalar josparyna sáıkes, jalpy belgilengen qýaty keminde 8,4 GVt bolatyn jańartylatyn energııa kózderi obektilerin iske asyrý josparlanǵan.
-Biz bul maqsatqa júıeli túrde qadam basyp kelemiz. Energııa jınaqtaý júıeleri týraly zań qazir qaralýda jáne bul – bizdiń strategııalyq basymdyqtarymyzdyń biri. Sonymen qatar uzaq merzimdi perspektıvaǵa arnalǵan jasyl energetıkany damytý tujyrymdamasy ázirlený ústinde, – dep atap ótti Turar Álimjan.
Onyń aıtýynsha, tómen kómirtekti energetıkany odan ári damytý óńir elderiniń kúsh-jigerin shoǵyrlandyrýdy, tájirıbe almasýdy jáne kelisilgen tásilderdi qalyptastyrýdy talap etedi.
Osyǵan deıin Qazaqstannyń Koreıadan jasandy ıntellekt pen «jasyl» energetıkaǵa ınvestıtsııa tartatyny týraly jazdyq.
