Elimizde «Jasyl el» jastar eńbek jasaqtarynyń XXI maýsymy bastaldy
ASTANA. KAZINFORM - Qazaqstanda «Jasyl el» jastar eńbek jáne stýdenttik qurylys jasaqtarynyń XXI maýsymy bastaldy. Saltanatty is-shara QR Mádenıet jáne aqparat mınıstrliginiń qoldaýymen Aqtóbe qalasynda ótti.
Ashylý rásimine QR Mádenıet jáne aqparat mınıstrligine qarasty Jastar jáne otbasy isteri komıtetiniń tóraǵasy Qaırat Qambarov, Aqtóbe oblysynyń basshylyǵy, respýblıkalyq jáne óńirlik jastar uıymdarynyń kóshbasshylary men «Jasyl el» jasaqtarynyń músheleri – jalpy myńǵa jýyq adam qatysty.
Maýsymnyń ashylýy aıasynda «Jastar. Eńbek. Bolashaq» atty dıalog alańy uıymdastyryldy. Onda spıkerler jastarmen birge stýdentterdi jumyspen qamtý, óńirlerde jastar eńbek jasaqtaryn damytý perspektıvalary, ekologııalyq bilim berý, jastardyń ekosanasyn qalyptastyrý jáne tabıǵatty qorǵaýǵa atsalysý máselelerin talqylady.
Ashylý rásimi kontserttik baǵdarlamamen aıaqtaldy. «Jasyl el» jastar eńbek jasaqtarynyń jumysy elimizdiń barlyq óńirinde bastaldy.
Aıta keteıik, eldi kógaldandyrýǵa úles qosqysy keletin 16 men 29 jas aralyǵyndaǵy jastar «Jasyl el» jasaqtarynyń jumysyna qatysa alady.
Joba jyl saıyn Qazaqstan boıynsha 30 000-nan astam jasty maýsymdyq jumyspen qamtıdy.
Bıyl «Jasyl el» baǵdarlamasyna 140 myń stýdent qatysady.