Elimizde «Jasyl balabaqshalar» sany artyp keledi

ASTANA. KAZINFORM — Elimizde «Taza Qazaqstan» ekologııalyq jalpyulttyq qozǵalysy aıasynda júzege asyrylyp jatqan «Jasyl balabaqsha» jobasyna qatysatyn mektepke deıingi uıymdardyń sany artyp keledi. 

QR Oqý-aǵartý mınıstrliginiń málimetinshe, joba boıynsha óńirlerde 156 mektepke deıingi uıym jumys júrgizip jatyr.

Jobanyń negizgi maqsaty — óskeleń urpaqtyń tabıǵatqa degen súıispenshiligin arttyrý jáne ekologııalyq mádenıetti balalyq shaqtan qalyptastyrý. Jańartylǵan mektepke deıingi tárbıeleý men oqytýdyń úlgilik oqý baǵdarlamasynda balalardyń ekologııalyq bilimin damytýǵa, tabıǵatqa uqypty qaraýǵa jáne ony qorǵaý daǵdylaryn qalyptastyrýǵa erekshe kóńil bólingen.

— Ekologııalyq tárbıe balalardyń jas erekshelikterin eskere otyryp júrgiziledi. Ol olardyń tabıǵat týraly túsinikterin keńeıtýge, ósimdikter men janýarlar dúnıesimen tanysýǵa, qorshaǵan ortanyń tazalyǵyn saqtaýǵa, tabıǵı resýrstardy utymdy paıdalanýǵa, ósimdikterdi kútýge baǵyttalǵan. Munyń barlyǵy eńbeksúıgishtik pen jaýapkershilikti damytýǵa yqpal etedi, — deıdi mektepke deıingi bilim departamentiniń dırektory Manar Adamova.

Kishi jastaǵy balalarǵa ekologııalyq tárbıe «Qorshaǵan ortamen tanystyrý» baǵyty arqyly júzege asyrylady. Sebebi bul balalardyń tabıǵat týraly bastapqy túsinikterin qalyptastyrýǵa jáne oǵan degen durys kózqaras ornatýǵa múmkindik beredi. Bul jumys «Kórkem ádebıet», «Sýret salý», «Sóıleýdi damytý», «Matematıka negizderi» jáne «Mýzyka» sııaqty baǵyttarymen ıntegratsııada júrgiziledi.

Aıta keteıik, bıyl tsıfrlyq qujattarmen balabaqshaǵa qabyldaý jeńildeı tústi.