Elimizde jasandy ıntellektini oqytý bilim berý baǵdarlamasyna engiziledi
ASTANA.KAZINFORM – Qazaqstanda bilim berý júıesine jasandy ıntellekt elementterin engizý jańa standarttar aıasynda júzege asyrylady. Redaktsııanyń resmı saýalyna bergen jaýabynda QR Oqý-aǵartý mınıstrligi memlekettik jalpyǵa mindetti bilim berý standarttaryna engizilgen ózgerister 2026 jylǵy 1 qyrkúıekten bastap kúshine enetinin málimdedi.
Vedomstvonyń habarlaýynsha, jasandy ıntellekt jekelegen pán retinde engizilmeıdi, kerisinshe qoldanystaǵy oqý baǵdarlamalaryna kiriktirilgen formatta qarastyrylǵan.
– JI quzyretteri bilim berý salalary men oqý pánderiniń mazmunyna aqparattyq-tehnologııalyq jáne metapándik quzyretterdi qalyptastyrý arqyly engiziledi, – dep jaýap berdi mınıstrlik.
Atap aıtqanda, jasandy ıntellekt elementteri:
- qazaq tili men ádebıeti pánderinde mátindi taldaý jáne qysqasha mazmundaý barysynda,
- shet tilderinde óner men mádenıettegi JI qoldanylýyn zerdeleý kezinde,
- jaratylystaný pánderinde modeldeý men derekterdi taldaý úshin,
- tarıh pen quqyq negizderinde zertteý tapsyrmalaryn oryndaý jáne tsıfrlyq saraptama jasaý kezinde,
- eńbek pen mýzyka sabaqtarynda vızýalızatsııa, 3D grafıka jáne aýdıo-vıdeo kontentterdi óńdeý úshin qoldanylatyn bolady.
Mınıstrlik málimetinshe, bul tásil oqý mazmunyn almastyrýdy kózdemeıdi jáne jasandy ıntellekt oqý protsesinde pándik bilimdi tereńdetýge arnalǵan qosymsha qural retinde paıdalanylady.
Aıta keteıik, buǵan deıin elordada tehnıkalyq jáne kásiptik bilim berý júıesinde JI quraldaryn qoldanýǵa baǵyttalǵan jańa respýblıkalyq baǵdarlama jaıly jazǵan edik.