Elimizde jas oqyrmandarǵa arnalǵan kitap qory 7 mıllıonnan asty
ASTANA. KAZINFORM — Qazaqstanda balalar men jasóspirimderge qyzmet kórsetetin 300-den astam kitaphana jumys isteıdi.
Mádenıet jáne aqparat mınıstrliginiń baspasóz qyzmeti atap ótkendeı, balalardyń kitap oqýǵa qyzyǵýshylyǵyn arttyrý — Qazaqstannyń mádenı, bilim berý jáne aqparattyq saıasatyndaǵy basym baǵyttardyń biri.
Osy maqsatta elimizde kitaphanalardy jańǵyrtý, kitap qoryn tolyqtyrý, baspa isin damytý jáne balalar men jasóspirimder arasynda kitap oqý mádenıetin keńinen nasıhattaý baǵytynda júıeli jumystar júrgizilip keledi.
Búginde Qazaqstanda balalar men jasóspirimderge qyzmet kórsetetin 300-den astam kitaphana jumys isteıdi. Kitaphanalardyń qorynda 7 mıllıonnan astam kitap jınaqtalǵan. Al turaqty oqyrmandar sany 1,7 mıllıonnan asady.
Kitaphanalardaǵy oqyrman suranysy balalar ádebıetine degen qyzyǵýshylyqtyń jyldan-jylǵa artyp kele jatqanyn ańǵartady.
— Jas oqyrmandardyń súıip oqıtyn shyǵarmalary mynalar: «Meniń atym Qoja» — Berdibek Soqpaqbaev; «Jýsan ıisi» — Saıyn Muratbekov; «Áke men bala» — Ybyraı Altynsarın; «Balalyq shaqqa saıahat» — Berdibek Soqpaqbaev; «Kókserek» — Muhtar Áýezov. 2026 jyly kitaphanalar qoryn balalar men jasóspirimderge arnalǵan 42 myń jańa kitappen tolyqtyrý josparlanyp otyr. Bul jas oqyrmandar úshin qazirgi zamanǵy jáne klassıkalyq ádebıetpen keńirek tanysýǵa múmkindik beredi, — delingen habarlamada.
Balalar ádebıetine degen qyzyǵýshylyq kitaphanalarmen ǵana shektelmeıdi. Jyl basynan beri kitap dúkenderinde balalarǵa arnalǵan 200 myńnan astam kitap satyldy.
— Kitap oqý balanyń oı-órisin keńeıteıdi, synı oılaý qabiletin damytady, tanym kókjıegin baıytady, ári ulttyq jáne álem ádebıetine qyzyǵýshylyǵyn arttyrady. Sondyqtan kitap oqýǵa qushtar urpaq tárbıeleý — eldiń zııatkerlik ári rýhanı áleýetin nyǵaıtýdyń mańyzdy tetikteriniń biri, — delingen mınıstrlik habarlamasynda.
Buǵan deıin Kazinform tilshisi Qazaqstanda kitap salasynyń damýyna ne kedergi ekenin saralap kórdi.
