Elimizde jartyjyldyq qorytyndysy boıynsha azyq-túlik baǵasy tómendegen

ASTANA. KAZINFORM – 1 shildede vıtse-premer Serik Jumanǵarınniń tóraǵalyǵymen ótken keńeste áleýmettik mańyzy bar azyq-túlik taýarlarynyń baǵasyna qatysty jaǵdaıdyń qorytyndylary talqylanyp, kúzgi jáne kóktemgi turaqtandyrý qorlarynda kókónis qorlaryn qalyptastyrý barysy ortaǵa salyndy. 

Jartyjyldyq qorytyndysy boıynsha áleýmettik mańyzy bar azyq-túlik taýarlary baǵasynyń turaqty deflıatsııasy baıqalady: maýsymda ortasha baǵa ındeksi 0,3%-ǵa, al jyl basynan beri jalpy 0,2%-ǵa tómendedi. Baǵanyń tómendeý úrdisi jalǵasýda.

Saýda jáne ıntegratsııa birinshi vıtse-mınıstri Aıjan Bıjanovanyń aıtýynsha, keıingi aptada baǵalar ortasha taǵy 0,1%-ǵa tómendegen. Ásirese, 9 taýar boıynsha: sábiz (1,5%), qaraqumyq jarmasy (0,8%), un (0,7%), sút (0,5%), taýyq eti (0,2%), kúrish, sıyr eti, tuz jáne qant (0,1%).

Baǵanyń tómendeýi 10 oblysta baıqalady. Aıtarlyqtaı tómendeý Mańǵystaý oblysynda (0,4%) jáne Pavlodar oblysynda (0,3%) baıqalǵan. 

Aýyl sharýashylyǵy vıtse-mınıstri Erbol Tasjúrekov óńirlerdegi erte pisetin ónimderge kelisimshart jasaý barysyn baıandady. Qazirgi ýaqytta ákimdikter maýsym-shilde aılaryna erte pisetin kókónisterge 37 myń tonna kóleminde forvardtyq kelisimsharttar jasasty.

Vıtse-mınıstr 1 tamyzǵa deıin óńirler kúzgi ónimdi forvardtyq satyp alý aıasynda aýyl sharýashylyǵy óndirýshilerin qarjylandyrý qajettigin, fermerlerdiń jeńildetilgen qarajatty ýaqytyly alýyn qamtamasyz etý kerek ekenin atap ótti.