Elimizde jańǵyrtýdan ótken taǵy bir temirjol vokzaly paıdalanýǵa berildi
ASTANA.KAZINFORM - Aqmola oblysynda Jaqsy temirjol vokzalynyń ǵımaratyn rekonstrýktsııalaý jumystary aıaqtaldy. Nysandy jańartý Memleket basshysynyń tapsyrmasy boıynsha elimizdegi 124 temirjol vokzalyn rekonstrýktsııalaý jáne jańǵyrtý jónindegi aýqymdy baǵdarlamasy aıasynda júzege asyryldy.
Vokzaldyń ashylý rásimine Aqmola oblysy ákiminiń birinshi orynbasary Eldos Ramazanov, «Qazaqstan temir joly» UK» AQ ókilderi, temirjol salasynyń ardagerleri jáne aýdan turǵyndary qatysty.
Qaıta jańǵyrtý jumystary barysynda vokzal ǵımaratynyń aýmaǵy 203-ten 222-i sharshy metrge deıin ulǵaıtylyp, jolaýshylar perrony 388 metrden 503 metrge deıin uzardy. Ǵımarattyń shatyry, qasbeti jáne ishki bólmeleri jańartylyp, ınjenerlik jeliler, jylytý, sýmen jabdyqtaý jáne elektrmen qamtý júıeleri tolyq jańǵyrtyldy.
Ǵımaratta jıhaz jáne qajetti jabdyqtar ornatylyp, irgeles aýmaq abattandyrylǵan, jolaýshylar perrony jańartylǵan.
Kólik mınıstrligi málimetinshe, vokzaldyń qasbeti men ishin bezendirý kezinde otandyq óndiristiń zamanaýı qurylys materıaldary paıdalanyldy. Kedergisiz ortany qurý úshin múmkindigi shekteýli jolaýshylarǵa arnalǵan yńǵaıly syrtqy kótergish ornatyldy.
Jaqsy temirjol vokzaly 1960 jyly salynǵan, ondaǵan jyldardan beri endi kúrdeli jóndeýden ótti. Stantsııa arqyly 8 jolaýshylar poıyzy qatynap, Astana, Almaty, Qostanaı, Arqalyq, Semeı, Pavlodar jáne Mańǵystaý baǵyttarymen jolaýshylar qatynasyn qamtamasyz etedi.
Aıta keteıik, Qyzylorda oblysyndaǵy úsh tarıhı vokzal jańǵyrtýdan keıin qaıta ashyldy.
