Elimizde jańǵyrtylǵan 70 temirjol vokzaly paıdalanýǵa berildi
ASTANA. KAZINFORM – Qazaqstanda jaz bastalǵaly beri qaıta jańǵyrtýdan ótken 70 temirjol vokzaly paıdalanýǵa berildi. Onyń 40-y shilde aıynda ashyldy. Jobalar Memleket basshysynyń tapsyrmasymen júzege asyp jatqan eldegi 124 temirjol vokzalyn rekonstrýktsııalaý jáne jańǵyrtý baǵdarlamasy aıasynda iske asyrylýda, dep habarlaıdy Kólik mınıstrliginiń baspasóz qyzmeti.
Qaıta jańǵyrtý aıasynda iri óńirlik vokzaldarmen qatar shaǵyn stantsııalar da jańartyldy. Eń aýqymdy jumystar Aqmola oblysynda júrgizilip, munda 12 vokzal jóndeldi. Qaraǵandy oblysynda 11 nysan jańartyldy. Onyń ishinde jolaýshylar platformalary men Qaraǵandy – Sortırovochnaıa stantsııasynyń ınfraqurylymy bar.
Sonymen qatar qaıta jańǵyrtý jumystary Atyraý, Aqtóbe, Qyzylorda, Almaty, Shyǵys Qazaqstan, Soltústik Qazaqstan, Batys Qazaqstan, Pavlodar, Qostanaı, Mańǵystaý, Túrkistan, Jambyl, Jetisý jáne Ulytaý oblystarynda júrgizildi.
– Qaıta jańǵyrtý barysynda nysandardyń tehnıkalyq jaǵdaıyna qaraı kúrdeli jóndeý jumystary júrgizildi nemese jańa jolaýshylar keshenderi salyndy. Birqatar stantsııalarda eski ǵımarattar buzylyp, olardyń ornyna jańa vokzaldar boı kóterdi. Basqa nysandarda vokzaldardyń aýmaǵy keńeıtilip, kótergish konstrýktsııalar kúsheıtilip, konkorstar salyndy, sondaı-aq jolaýshylar platformalary men aıaldaý pavılondary qaıta jańǵyrtyldy, – delingen mınıstrlik habarlamasynda.
Barlyq nysanda shatyrlar men qasbetter jańartylyp, káriz, sý, jylý, elektrmen jabdyqtaý jáne baılanys júıeleri aýystyryldy. Ǵımarattardyń ishki árleý jumystary júrgizilip, irgeles aýmaqtar abattandyryldy. Vokzaldarǵa zamanaýı jıhazdar, navıgatsııalyq júıeler, jeldetý jáne kondıtsıonerleý júıeleri, beınebaqylaý kameralary, órt jáne kúzet dabyldary, qoljetimdilikti baqylaý júıeleri, ıntroskoptar men metall izdegishter ornatyldy.
Erekshe nazar kedergisiz orta qalyptastyrýǵa aýdaryldy. Vokzaldar pandýstarmen, lıfttermen jáne kótergish qurylǵylarmen, taktıldi navıgatsııamen, qyzmetkerlerdi shaqyrý júıelerimen, sanıtarlyq bólmelermen jáne aqparattyq kórsetkishtermen jabdyqtaldy.
Birqatar nysandardyń aýmaǵy da edáýir keńeıtildi. Atap aıtqanda, Oral stantsııasy vokzalynyń aýmaǵy 5 778 sharshy metrden 6 346 sharshy metrge deıin, Shetpe stantsııasynda 201 sharshy metrden 1 090 sharshy metrge deıin, Shalqar stantsııasynda 472,8 sharshy metrden 833,6 sharshy metrge deıin, Qazybek bek stantsııasynda 82,3 sharshy metrden 236,7 sharshy metrge deıin, al Jetisý stantsııasynda 135,7 sharshy metrden 258,3 sharshy metrge deıin ulǵaıtyldy. Aqshy stantsııasynda jańa zamanaýı aıaldaý pavılony salynsa, Temirtaý stantsııasynda jolaýshylar platformasy qaıta jańǵyrtyldy.
– Jańartylǵan vokzaldar kún saıyn ondaǵan myń jolaýshyǵa qyzmet kórsetip, Qazaqstannyń barlyq óńirleri arasyndaǵy, sondaı-aq Reseı, Ózbekstan, Qyrǵyzstan jáne Tájikstanmen temirjol qatynasyn qamtamasyz etedi. Júrgizilgen jumystardyń nátıjesinde temirjol vokzaldary barlyq sanattaǵy jolaýshylar úshin jaıly ári qoljetimdi bola tústi. Bul kólik qyzmetteriniń sapasyn arttyrýǵa jáne jolaýshylar tasymalyn damytýǵa yqpal etedi, – dep atap ótti mınıstrlik.
Aıta keteıik, buǵan deıin óńirlerde jańa vokzaldar, sý qubyry, logıstıkalyq hab jáne turǵyn úıler paıdalanýǵa berilgeni habarlandy.
