Elimizde janar-jaǵarmaı qory jetkilikti me

ASTANA. KAZINFORM – Elimizdegi munaı óńdeý zaýyttary ishki naryqty benzınmen, dızel otynymen tolyq qamtamasyz etip otyr ma? Bul suraqqa Energetıka mınıstrligi jaýap berdi.

- Qazirgi ýaqytta Pavlodar MHZ, Shymkent jáne Atyraý MÓZ 96-98% ónimdilikte jumys isteıdi. Janar-jaǵarmaı qorlaryn tolyqtyrý úzdiksiz júrgiziledi. Jalpy, eldegi JJM-niń jıyntyq qory naryq qajettiligin tolyq jabýdy qamtamasyz etedi, - delingen mınıstrliktiń Kazinform agenttigine bergen jaýabynda.

Qazir eldegi munaı bazalarynda jáne tıelgen kólikterdegi janar-jaǵarmaıdyń jıyntyq qory:

• - AI-92 benzıni - 366 myń tonna (el qajettiliginiń 30 kúni);
• - AI-95 benzıni - 73 myń tonna (20 kún);
• - dızel otyny - 518 myń tonna (34 kún).

- Mınıstrliktiń basym mindeti – janarmaı boıynsha ishki naryqty qamtamasyz etý Oǵan qosa elimizdegi otyn baǵasy kórshiles elderden tómen bolǵandyqtan, «sur» eksportqa jol bermeýge nazar aýdarylǵan. Sondyqtan 2025 jylǵy 19 mamyrdan bastap «Qazaqstan Respýblıkasy aýmaǵynan munaı ónimderin áketýdiń keıbir máseleleri týraly» QR Energetıka mınıstriniń 2025 jylǵy 30 sáýirdegi №184-n/q Buıryǵy kúshine endi, - dep atalyp ótken vedomstvo aqparatynda.

Buǵan deıin Energetıka mınıstrligi benzın baǵasynyń kúrt ósýine jol berilmeıtinin habarlaǵan edi. 

Eske salsaq, 2026 jyldan bastap Qazaqstanda motor maılarynyń tsıfrlyq tańbalanýy engiziledi.