Elimizde jańadan salynatyn avtojoldar belgili boldy

ASTANA. KAZINFORM – El aýmaǵynda avtokólikpen júk tranzıtin ári qaraı damytamyz. Bul týraly Parlament Májilisinde kólik-logıstıkalyq áleýetti damytý taqyrybyna arnalǵan Úkimet saǵatynda Kólik mınıstri Marat Qarabaev málim etti.

- Tranzıttik áleýette avtokólikke jeke toqtalǵym keledi. Óıtkeni bul tasymal túri jyldan-jylǵa eselep ósip jatyr. 2023 jyly tranzıt 40%-ǵa, al ımport/eksport 20%-ǵa ulǵaıdy. Sonyń ishinde Qytaımen tasymaldyń ósý qarqyny óte joǵary. Byltyr ımport/eksport 2 jarym esege, al tranzıt 2 esege ulǵaıyp, tıisinshe 1,8 jáne 2,2 mln tonnany qurasa, bıyl toǵyz aıdyń ózinde osy kórsetkishter taǵy da 59 jáne 67 %-ǵa ósti (1,9 mln jáne 2,5 mln tonna). Kórshi elder de ózderiniń tranzıt áleýetin arttyrý úshin tıisti ınfraqurylymdy damytý jumystaryn atqaryp otyr. Sondyqtan biz óz ınfraqurylymymyzdy damyta otyryp, Qazaqstan arqyly ótetin qosymsha 3 marshrýtty alǵa jyljytyp jatyrmyz. Birinshi baǵyt - «Batýmı-Varna-Konstantsa» arqyly sý joly. Ekinshisi – Baký, Grýzııa arqyly Túrkııaǵa shyǵatyn mýltımodaldy jol. Al úshinshi baǵyt – «Túrikmenstan-Iran-Túrkııa» arqyly Eýropaǵa shyǵatyn qurlyq joly, - dedi M.Qarabaev.

Onyń aıtýynsha, kóliktiń basqa túrlerimen salystyrǵanda eń joǵary tasymal ósimin avtokólik baǵyty baıqatyp otyr. Sondyqtan basty baǵyttardyń biri - avtomobıl tranzıtin ári qaraı damytý. Ol úshin saladaǵy ákimshilik sharalardy tıimdi retteý jáne ınfraqurylymdy, ıaǵnı avtojoldardyń jaǵdaıyn jaqsartý qajet.

- Ákimshilik salalarǵa toqtalatyn bolsaq, bıyl Qytaı jáne Ózbekstan elderimen tasymal úshin beriletin sheteldik ruqsat blankilerdi tolyqtaı elektrondy formatqa ótkizdik. Nátıjesinde, reıster sany Ózbekstanmen 6 myńnan 36 myńǵa, Qytaımen 113 myńnan 230 myńǵa deıin ósti. Sonymen qatar, sheteldik blankilerdi qoldaný úrdisindegi adamı faktor tolyǵymen alynyp, sybaılas jemqorlyq táýekelderi túbegeıli joıyldy, - dedi mınıstr.

Sonymen qatar ol jol ınfraqurylymyna toqtala kele, Memleket basshysynyń tapsyrmasy aıasynda bıyl 12 myń shaqyrym jol qurylys jumystarymen qamtylǵanyn aıtty. Onyń 7 myń shaqyrymynda qurylys jáne jóndeý jumystary tolyqtaı aıaqtaldy. «Qaraǵandy – Almaty», «Taldyqorǵan – Óskemen», «Aqtóbe – Atyraý – Astrahan» sııaqty basty tranzıttik dálizderde jańa asfalt tósemimen kólik qozǵalysy ashyldy.

- Qoldanystaǵy joldardy damytý úshin 2030 jylǵa deıin «Qyzylorda – Aqtóbe» jolyn 4 jolaqtyǵa aýystyrý, sondaı-aq Saryaǵash qalasynyń birinshi sanattaǵy aınalma jolyn salý josparlanǵan. Munymen qosa, «Qalbataý – Maıqapshaǵaı» avtojolyn rekonstrýktsııalaý jumystary, Qaraǵandydan Boǵaz aýylyna deıingi jol ýchaskeleriniń ortasha jóndeýi júrgizilip jatyr. Keler jyldan bastap «Qaraǵandy – Jezqazǵan» avtojolyn rekonstrýktsııalaý jumystary bastalady. Bul sharalardy aıaqtaý nátıjesinde, qazirgi «Batys Eýropa – Batys Qytaı» dálizine balamaly jańa marshrýt qalyptasady. Kelesi úlken másele - Beıneý men Sekseýildiń arasyn jalǵaıtyn jańa jol salý. Osyǵan baılanysty 2027 jyldan bastap 736 shaqyrymdyq avtojol qurylysy bastalady. Bul Aqtaý men Quryq porttaryna jáne Túrikmenstanǵa baratyn joldardy 900 shaqyrymǵa qysqartýǵa jáne ońtústik pen batys óńirleriniń baılanysyn arttyrýǵa múmkindik beredi, - dedi vedomstvo basshysy.

Budan buryn habarlanǵandaı, Marat Qarabaev Quryq portynyń janynda keme qurastyratyn zaýyt salynatynyn aıtty.