Elimizde jańa memlekettik nagradalar taǵaıyndaldy: Prezıdent zańǵa qol qoıdy

ASTANA. KAZINFORM — Memleket basshysy Qasym-Jomart Toqaev 2026 jylǵy 11 qarashada «Qazaqstan Respýblıkasynyń memlekettik nagradalary týraly» QR Zańyna ózgerister men tolyqtyrýlar engizý týraly zańǵa qol qoıdy.

Toqaev
Foto: Aqorda

Qujatta memlekettik nagradalar men qurmetti ataqtardyń tizbesin naqtylaý, sondaı-aq tıisti ataqtarǵa ıe bolǵan pedagogter men medıtsına qyzmetkerlerine birjolǵy tólemder engizý qarastyrylǵan.

Qujatqa sáıkes, «Altyn Qyran» ordeni Qazaqstan Respýblıkasynyń eń joǵary dárejeli erekshelik belgisi bolyp aıqyndaldy.

«Halyq qaharmany» ataǵyna qatysty erejeler de naqtylandy.

— «Halyq qaharmany» ataǵyna ıe bolǵan adamdarǵa aıryqsha erekshelik belgisi — «Altyn juldyz» jáne «Otan» ordeni tabystalady, — delingen qujatta.

Sonymen qatar, Qazaqstan Respýblıkasynyń ordenderi qataryna myna marapattar jatady:

· «Otan»;

· «Barys»;

· «Dańq»;

· «Al-Farabi»;

· «Qoja Ahmet Yasaui»;

· «Qazaqstan Respýblıkasynyń Tuńǵysh Prezıdenti — Elbasy Nursultan Nazarbaev»;

· «Meıirim»;

· «Aıbyn»;

· «Parasat»;

· «Dostyq»;

· «El birligi»;

· «Qurmet»;

· «Eńbek Dańqy».

Qazaqstan Respýblıkasynyń ordenderi tizbesine «Al-Farabi» jáne «Qoja Ahmet Yasaui» ordenderi engizildi. Osylardyń alǵashqysy bilim men ǵylym, mádenıet jáne rýhanı ómir salalarynda aıryqsha eńbek sińirgen Qazaqstan azamattary men sheteldikterge beriledi. Al «Qoja Ahmet Yasaui» ordenimen aǵartýshylyq, mádenı-gýmanıtarlyq jáne áleýmettik salalarǵa eleýli úles qosqan otandyq jáne sheteldik ǵalymdar, memlekettik jáne qoǵam qaıratkerleri marapattalady.

Odan bólek, Qazaqstan Respýblıkasynyń medaldary qataryna mynalar kiredi:

· «Erligi úshin»;

· «Jaýyngerlik erligi úshin»;

· «Shámshi Qaldaıaqov»;

· «Eren eńbegi úshin»;

· «Shapaǵat».

Memlekettik medaldar tizbesine «Shámshi Qaldaıaqov» medali engizildi.

— «Shámshi Qaldaıaqov» medalimen kompozıtorlar, dırıjerler, án avtorlary, dástúrli jáne estradalyq mýzyka oryndaýshylary, sondaı-aq mýzykalyq jáne án óneriniń damýyna zor úles qosqan Qazaqstan azamattary men sheteldikter marapattalady, — delingen qujatta.

Ózgeristerdiń jeke bir bóligi qurmetti ataqtarǵa qatysty. Olardyń qatarynda «Qazaqstannyń eńbek sińirgen ustazy», «Qazaqstannyń eńbek sińirgen dárigeri», «Qazaqstannyń eńbek sińirgen ınjeneri», «Qazaqstannyń eńbek sińirgen qurylysshysy», «Qazaqstannyń eńbek sińirgen kenshisi», «Qazaqstannyń eńbek sińirgen geologi», «Qazaqstannyń halyq ártisi», «Qazaqstannyń halyq jazýshysy» jáne «Qazaqstannyń eńbek sińirgen sýretshisi» ataqtary bar.

Qujatta materıaldyq yntalandyrý sharalary da qarastyrylǵan. «Qazaqstannyń eńbek sińirgen ustazy» qurmetti ataǵyna ıe bolǵan pedagogterge «Pedagog mártebesi týraly» zańda belgilengen mólsherde birjolǵy tólem beriledi.

Al «Qazaqstannyń eńbek sińirgen dárigeri» qurmetti ataǵyna ıe bolǵan medıtsına qyzmetkerlerine «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń kodeksinde belgilengen mólsherde birjolǵy tólem tólenedi.

«Qazaqstannyń ǵaryshker-ushqyshy» ataǵynyń ıegerleri arnaıy memlekettik járdemaqy alýǵa quqyly.

Sonymen qatar, «Qazaqstannyń halyq ártisi» jáne «Qazaqstannyń halyq jazýshysy» ataqtaryn berý krıterııleri naqtylandy. Bulardyń alǵashqy atalǵany teatr, tsırk, mýzyka jáne kıno óneriniń damýyna erekshe úles qosqan adamdarǵa beriledi. Al ekinshi ataq Qazaqstan ádebıetiniń damýyna aıryqsha eńbek sińirgen tulǵalarǵa tabystalady.

Zańnyń jańartylǵan redaktsııasynda «Qazaqstannyń eńbek sińirgen sýretshisi» qurmetti ataǵyn berý negizderi de jeke kórsetilgen. Bul ataqqa sýretshiler, músinshiler, keskindemeshiler, grafıkter, zerger-sýretshiler, dızaınerler, restavratorlar men sándik-qoldanbaly óner sheberleri, sondaı-aq monýmentaldy jáne beıneleý óneriniń damýyna erekshe úles qosqan ári buǵan deıin Qazaqstannyń memlekettik nagradasymen marapattalǵan basqa da tulǵalar ıe bola alady.

Taǵy bir ózgeris kópbalaly analarǵa beriletin nagradalarǵa qatysty. Zańda olardyń qataryna «Altyn alqa» jáne «Kúmis alqa» alqalary jatatyny bekitildi.

Eń joǵary dárejeli erekshelik belgilerimen, «Otan», «Barys» I dárejeli, «Dańq» I dárejeli, «Al-Farabi» jáne «Qoja Ahmet Yasaui» ordenderimen marapattalǵan azamattar týraly málimet Qazaqstan Respýblıkasy Úkimeti quratyn Qazaqstan Respýblıkasynyń Dańq kitabyna engiziledi.

Qazaqstan Respýblıkasynyń Dańq kitabyn júrgizý jáne saqtaý qaǵıdalaryn, sondaı-aq onyń sıpattamasyn Qazaqstan Respýblıkasynyń Úkimeti bekitedi.

Zańǵa Qazaqstan Respýblıkasynyń Prezıdenti qol qoıǵan kúnnen bastap qoldanysqa engiziledi.

Aıta keteıik, buǵan deıin Oralda 4 jasar balany qutqaryp qalǵan polıtseılerge «Erligi úshin» medali tabystalǵanyn jazǵanbyz.

Sonymen qatar, Memleket basshysy Iordanııa Korolin Al-Farabi ordenimen marapattady.

Odan bólek, Ortalyq Azııa óner qaıratkerleri «Dostyq» ordenine ıe boldy.