Elimizde jańa qoǵamdyq-saıası júıe qalyptasady – Prezıdent reformanyń mańyzdylyǵyn atap ótti

ASTANA. KAZINFORM – Memleket basshysy Qasym-Jomart Toqaev Qarjylyq monıtorıng agenttiginde ótken jıynda sóılegen sózinde agenttik aldynda kóptegen kúrdeli ári mańyzdy mindet turǵanyn atap ótti. 

– Sizderge júkteletin jaýapkershilik – óte joǵary. Agenttik Bas prokýratýramen, Ulttyq qaýipsizdik qyzmetimen, Іshki ister mınıstrligi sekildi basqa da quqyq qorǵaý organdarymen úılesimdi áreket etýi kerek. Olar da Qarjylyq monıtorıng agenttigine qoldaý kórsetýge tıis. Quzyrettik mindetterdiń qaıtalanýy, jón-josyqsyz báseke, baqtalastyq memleket múddesine zardabyn tıgizedi. Álemde strategııalyq belgisizdik beleń alǵan qazirgideı jaǵdaıda bul óte qaýipti. Dushpandarymyzdyń ulttyq múddemizge zııan keltirýine jol berýge bolmaıdy. Únemi aıtamyn: «Táýelsizdik – bárinen qymbat». Muny barshamyz, Qarjylyq monıtorıng agenttiginiń qyzmetkerleri árdaıym este ustaýy kerek. Ár qyzmetker, eń aldymen, adal azamat jáne myqty maman bolýǵa tıis. Ar tazalyǵyn saqtaý, Otan aldyndaǵy antqa berik bolý – paryz. «Zań men tártip» qaǵıdaty – kópshilikke qarata aıtylǵan uran emes, bul – árbir memlekettik qyzmetshiniń, árbir adamnyń ózinen bastalýǵa tıis sanaly qadam. Biz Ádiletti, Qaýipsiz, Kúshti, Taza ári Ozyq Qazaqstandy quryp jatyrmyz. Aýqymdy ózgeristerdiń kelesi – sheshýshi kezeńine qadam bastyq. Konstıtýtsııalyq reformany qolǵa aldyq, búginde Komıssııa belsendi túrde jumys istep jatyr. Barlyq usynys muqııat saraptalady, túzetýlerdiń jobasy ázirlenedi. Halyq bul jobamen tanysyp, referendýmda túbegeıli sheshim qabyldaıdy. Osylaısha, elimizde jańa qoǵamdyq-saıası júıe qalyptasady. El ishindegi turaqtylyqty saqtaýǵa, ınvestıtsııalyq ahýaldy jaqsartýǵa jáne halyqtyń ál-aýqatyn arttyrýǵa arnalǵan jumys tyń qarqynmen jalǵasady, - dedi Memleket basshysy. 

Eske sala ketsek, buǵa deıin Prezıdent Qarjylyq monıtorıng agenttiginde jıyn ótkizgenin jazǵan edik.