Elimizde jańa baǵyttar ashylyp, halyqaralyq áýe reısteri kóbeıdi
ASTANA. KAZINFORM — Memleket basshysy Qazaqstannyń kólik-logıstıka áleýetin keńeıtip, elimizdi Eýrazııadaǵy iri tranzıt habyna aınaldyrýǵa jiti mán beredi. Bul týraly QR Prezıdentiniń kómekshisi — Baspasóz hatshysy Rýslan Jeldibaı óziniń Telegram arnasynda habarlady.
Jol qurylysy
Rýslan Jeldibaıdyń sózinshe, 2025 jyly 13 myń shaqyrym avtokólik jolyn salý jáne jóndeý jumystary bastaldy. Jańa joldardyń uzyndyǵy — 1,9 myń shaqyrym. Strategııalyq turǵydan mańyzdy kúrejoldar qatarynda Ortalyq — Batys avtomagıstraly, Qaraǵandy — Jezqazǵan, Aqtóbe — Ulǵaısyn, Atyraý — Dossor ýchaskeleri bar.
Áýe qatynasy
Memleket basshysynyń tapsyrmasymen Zaısan, Katonqaraǵaı jáne Kendirlide úsh jańa áýejaı qurylysy bastaldy. Arqalyq áýejaıyn qalpyna keltirý jumystary qolǵa alyndy.
Prezıdent áýe arqyly júk tasymaldaıtyn alǵashqy ulttyq kompanııany qurý bastamasyn qoldady. Bul elimizdiń kólik áleýetin durys paıdalanyp, álemdik naryqqa shyǵýǵa múmkindik beredi.
2025 jyly el naryǵyna birqatar jańa áýe kompanııasy kirdi. Budan bólek, 35-ten astam jańa baǵdar, sonyń ishinde tuńǵysh ret Shanhaı, Gýanchjoý men Mıýnhenge tikeleı reıster ashyldy.
Temirjol
Qyzyljar — Moıynty ekinshi jolynyń, Almaty mańyndaǵy aınalma joldyń, Darbaza — Maqtaaral jáne Baqty — Aıagóz jańa temirjol jelileriniń qurylysy júrip jatyr.
El aýmaǵyndaǵy 124 vokzalǵa kúrdeli jóndeý, jańǵyrtý jumystary júrgizilip jatyr.
Budan buryn Qasym-Jomart Toqaev bıyl elimizdiń 9 óńirine jumys saparymen barǵanyn jazǵan edik.
Sondaı-aq bir jyl ishinde Memleket basshysy 23 ret shetelge shyqty.