Jańadan qurylǵan Alataý qalasynyń damý baǵyty aıqyndaldy
Elimizde jańa Alataý qalasy quryldy. Onyń jalpy aýdany – 88 myń gektar, qala halqynyń sany 52,7 myń adam. Bul týraly Ulttyq ekonomıka mınıstrliginen málim etti, dep habarlaıdy Kazinform.
«QR Prezıdentiniń tapsyrmasyn iske asyrý aıasynda Ulttyq ekonomıka mınıstrligi Alataý qalasyn qurý jónindegi uıymdastyrý is-sharalarynyń („Almaty oblysynyń ákimshilik-aýmaqtyq qurylysynyń keıbir máseleleri týraly“) josparyn ázirledi. Josparǵa sáıkes, Ulttyq ekonomıka mınıstrligi Almaty oblysynyń ákimdigimen birlesip ekonomıkalyq esepterdi, jańa qalanyń shemalyq kartasyn daıyndaý boıynsha jumystar júrgizdi. Sondaı-aq halyqpen jıyn ótkizilip, sonyń negizinde Almaty oblysy men Іle, Talǵar aýdandary jáne Qonaev qalasy máslıhattarynyń sheshimi qabyldandy. Jańa qalany qurý jol jelileri, ınjenerlik, áleýmettik ınfraqurylym obektilerin modernızatsııalaýǵa, jańa jumys oryndaryn ashýǵa, ınvestıtsııalardy, tehnologııalardy, qosymsha qarjy aǵyndaryn tartýǵa, kásipkerlik belsendilikti damytýǵa, salyq túsimderin ulǵaıtýǵa múmkindik beredi», — delingen mınıstrlik habarlamasynda.
Bul óńirdiń ınvestıtsııalyq tartymdylyǵy men ekonomıkalyq turaqtylyǵyn jaqsartýǵa yqpal etedi. Sonymen qatar Úkimet AEA (arnaıy ekonomıkalyq aımaq) aýmaǵyn 30 myń gektardan 96,5 myń gektarǵa deıin keńeıtý men G4 City AEA-ny Alatau AEA-ǵa qaıta ataý týraly sheshimdi maquldady.
Osylaısha, Alataý qalasynyń barlyq aýmaǵy jáne Qonaev qalasynyń bir bóligi AEA aýmaǵyna jatqyzylady. Arnaıy ekonomıkalyq aımaq aýmaǵynda qyzmettiń basym túri boıynsha EQJJ-nyń (ekonomıkalyq qyzmet túrleriniń jalpy jikteýishi) 17 ataýy negizinde 110 myń jańa jumys ornyn qura otyryp, jalpy somasy 12,5 trln teńgege 170-ten astam jobany ornalastyrý kózdelip otyr.
Boljamdy derekterge sáıkes, AEA obektileri jobalyq qýatyna shyqqannan keıin búkil kezeńdegi baǵalanǵan jıyntyq úlesi 47,3 trln teńge, onyń ishinde mýltıplıkatıvtik áseri 17 trln teńge.
Aıta keterligi, memlekettik ınvestıtsııanyń árbir 1 teńgesine 3,8 teńge jeke ınvestıtsııa tartylatyn bolady.
Buǵan deıin elimizde Alataý degen jańa qala paıda bolǵanyn jazǵan bolatynbyz.
