Elimizde jaldamaly baspana qandaı tártippen beriledi
ASTANA. KAZINFORM — Qazaqstanda jaldamaly baspana turǵyn úı kezegine qoıylǵan kúni men otbasynyń tabysyna qaraı bólinedi. Bul týraly OKQ ótken baspasóz májilisinde QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov aıtyp berdi.
Onyń aıtýynsha, turǵyn úı reformasynan keıin jaldamaly baspanany bólý tártibi ózgergen.
— Jaldamaly baspana turǵyn úıge muqtaj azamattyń kezekke qoıylǵan kúni men otbasynyń tabys deńgeıine qaraı bólinedi. Bıylǵy segiz aıda azamattarǵa 12 653 jaldamaly páter berildi, — dedi Baqytjan Júnisbekov.
Sonymen qatar vedomstvo ókili 2024 jyldyń jeltoqsanynan bastap azamattarǵa memlekettik turǵyn úı qoryndaǵy baspanany jekeshelendirýge múmkindik berilgenin atap ótti. Sodan beri bul múmkindikti 20 myńnan astam azamat paıdalanǵan.
— Al bıylǵy segiz aıda 6 824 otbasy memlekettik turǵyn úı qoryndaǵy baspanasyn jekeshelendirdi. Onyń 3 649-y baspanasyn óteýsiz negizde jekeshelendirýge múmkindik aldy, — dedi komıtet tóraǵasy.
Aıta keteıik, elimizde tabysy joq nemese tabysy tómen azamattardyń tórt sanatyna páter jaldaý aqysynyń bir bóligin memleket óteıdi. Alaıda baǵdarlama talaptary saqtalmasa, sýbsıdııa toqtatylady.
Aıta keteıik, buǵan deıin Qazaqstanda tabysy joq nemese tabysy tómen azamattardyń tórt sanatyna páter jaldaý aqysynyń bir bóligin memleket óteıtini habarlanǵan edi. Qazir mundaı kómekti 11 200 otbasy alyp otyr. Baǵdarlama talaptary saqtalmaǵan jaǵdaıda sýbsıdııa tóleý toqtatylady.
