Elimizde jalaqy bereshegi 36%-ǵa azaıdy

ASTANA. KAZINFORM – Qazaqstanda jalaqy boıynsha bereshek kólemi azaıyp, eńbek daýlarynyń aldyn alý sharalary kúsheıtilip jatyr. Bul týraly QR Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń tóraǵasy Meırambek Ahmetov málimdedi.

Onyń aıtýynsha, qabyldanǵan sharalar naqty nátıje bere bastaǵan.

– Bıylǵy 20 sáýirdegi jaǵdaı boıynsha jalaqy boıynsha aǵymdaǵy jáne merzimi ótken bereshek 36%-ǵa qysqaryp, 876 mln teńgeden 554 mln teńgege deıin tómendedi. Sonyń nátıjesinde memlekettik baqylaý aıasynda 17,5 myńnan astam jumyskerdiń quqyqtary qorǵaldy, – dedi ol.

Komıtet tóraǵasy eńbek daýlarynyń aldyn alý úshin tsıfrlyq baqylaý quraldary engizilgenin atap ótti.

– Qazirgi tańda Eńbek táýekelderi kartasyna shamamen 98 myń kásiporyn engizilgen. Bul júıe jaǵdaıdy naqty ýaqyt rejıminde baqylap, yqtımal táýekelderge jedel áreket etýge múmkindik beredi. Sonyń nátıjesinde toqsan qorytyndysy boıynsha joǵary táýekel deńgeıindegi kásiporyndar sany 530-ǵa azaıyp, 5 265-ten 4 735-ke deıin tómendedi, – dedi Meırambek Ahmetov.

Degenmen, táýekel tolyq joıylǵan joq. 1 sáýirdegi derek boıynsha 1 896 kásiporynda ujymdyq eńbek daýlarynyń týyndaý qaýpi joǵary deńgeıde saqtalyp otyr.

– Mundaı kásiporyndardyń basym bóligi iri qalalar men ónerkásiptik óńirlerde ornalasqan. Bul profılaktıkalyq jumysty kúsheıtip, jumys berýshilermen ózara is-qımyldy arttyrýdy talap etedi, – dedi komıtet tóraǵasy.

Onyń málimetinshe, qabyldanǵan sharalar ereýilder sanyna da áser etken. Ótken jyldyń osy kezeńimen salystyrǵanda olardyń sany eki esege qysqaryp, 6-dan 3 jaǵdaıǵa deıin azaıǵan. Alaıda negizgi kelispeýshilikter jalaqyny arttyrý, eńbek jaǵdaılaryn jaqsartý jáne ózge de áleýmettik máselelerge baılanysty týyndap otyr.

Eske salaıyq, buǵan deıin Astanada 254 kásiporynda eńbek quqyǵynyń buzylý qaýpi joǵary ekenin habarlaǵanbyz.