Elimizde jaqsy ózgerister jasalyp jatyr: Memleket basshysy jetistikterge toqtaldy
ASTANA. KAZINFORM — Prezıdent Qasym-Jomart Toqaev QR Konstıtýtsııasynyń 30 jyldyǵyna arnalǵan «Konstıtýtsııa jáne memlekettilik: quqyq pen bolashaq dıalogy» atty ǵylymı-praktıkalyq konferentsııada sóz sóıledi, dep habarlaıdy Aqordanyń baspasóz qyzmeti.
Qasym-Jomart Toqaev geosaıası turaqsyzdyq beleń alyp, tehnologııa kóz ilespes jyldamdyqpen damyp jatqan kezeńde zańnamany udaıy jańǵyrtýdyń mańyzy zor ekenin aıtty. Jappaı tsıfrlandyrý jáne jasandy ıntellekt memleket pen qoǵamdy órkendetýdiń múldem jańa uǵymdary men tásilderiniń paıda bolýyna yqpal etti.
— Kóptegen elde adamnyń róli men orny, jalpy onyń postgýmanıstik álemde tirshilik etýi jóninde qoǵamdyq jáne parlamenttik pikirtalastar qyzý júrip jatyr. Bıotehnologııanyń jedel damýy da biraz suraq týyndatady. Onyń saldary kúrdeli quqyqtyq kollızııaǵa jáne qalyptasqan etıkalyq normalardyń eskirýine ákelip soǵýda. Zań shyǵarýshylar halyqaralyq quqyq júıesin qaıta qurý arqyly óz eliniń egemendigin saqtaý mindetimen betpe-bet keledi. Sondyqtan konstıtýtsıonalızm eshqashan bir orynda turmaıdy. Ol zań shyǵarý úderisimen tyǵyz baılanysty. Alaıda oǵan múldem jańa tehnologııalyq, ekonomıkalyq jáne geosaıası jaǵdaılar áser etedi. Bul máseleni Qazaqstannyń kásibı zańgerler qaýymdastyǵy jan-jaqty zerttep, udaıy nazarda ustaýǵa tıis dep sanaımyn, — dedi Prezıdent.
Memleket basshysynyń sózinshe, Ult zańy – Konstıtýtsııamyzdyń jasampazdyq kúshi zor. Óıtkeni Ata Zańnyń ár babynda barsha azamattarymyzǵa ortaq qundylyqtar men birtutas halqymyzdyń maqsat-múddesi bar.
— Konstıtýtsııalyq, saıası, ekonomıkalyq reformalardyń, halqymyzdyń orasan zor kúsh-qýaty men áleýetiniń, sondaı-aq bilim, ǵylym jáne mádenıet salasyna salynǵan aýqymdy ınvestıtsııalardyń arqasynda elimizde shyn máninde jaqsy ózgerister jasalyp jatyr. Jaqsyny jaqsy dep aıtý kerek. Bul da ádilettilik kórinisi. Oqýshylarymyz ben stýdentterimiz bedeldi halyqaralyq olımpıadalarda top jaryp júr. Sportshylarymyz álemdik saıystarda jeńimpaz bolyp, elimizdiń mereıin asyrýda. Aldyna naqty maqsat qoıǵan azamattarymyzdyń bári bilim, ǵylym, óner, bıznes jáne basqa da kóptegen salada tabysqa jetýde, — dedi ol.
Prezıdent atap ótkendeı, Qazaqstan halyqaralyq qaýymdastyqqa ashyq memleket, bizde ǵalamtor erkindigi bar ekenin eshkim joqqa shyǵara almaıdy.
— Elimizde birde-bir jeliniń negizgi arnasy jabylǵan joq, barlyq azamattarǵa álemdik jańalyqtardyń kózderine jol ashyq. Bizdiń azamattarymyz shetelge erkin baryp turady. Al jastarymyz ózderi tańdaǵan ýnıversıtetterde bilim alýda, olarǵa eshqandaı tosqaýyl, kedergi joq. Osyndaı memlekettik saıasat óz jalǵasyn tabady. Kóptegen eldiń jastary bizdi bolashaǵy jarqyn memleket retinde tanıdy, Qazaqstanǵa kelgisi keledi, kelip te jatyr. Elimizdiń maqsaty – aıqyn, keleshegi – zor. Biz tsıfrlandyrý men jasandy ıntellektini el ıgiligine qoldanatyn ozyq memleket bolamyz dep belsendi túrde jumys istep jatyrmyz, — dep túıindedi Toqaev.
Buǵan deıin habarlanǵandaı, Memleket basshysy zańdy qurmetteý, tártipke baǵyný ultymyzdyń qanyna sińip, qasıetine aınalýy qajet ekenin aıtty.